یہ احتجاجی ریلی شہر کے سبھاش چوک سے ڈپٹی کمشنر آفس تک نکالی گئی جس میں پارٹی کے کئی کارکنان اور سینئر قائدین نے شرکت کی۔ اس ریلی میں ایڈوکیٹ ناگ رتنا ، موسبی چنپا ، وشواناتھ ، ہنمے گوڈا ، انصار الدین و دیگر شامل ہیں۔
اس موقع پر جنتادل سیکولر پارٹی کے سینئر رہنما وشواناتھ نے میڈیا سے بات کرتے ہوئے کہا کہ ریاستی صدر کمارا سوامی کے احکام پر ضلع یادگیر کی جنتادل سیکولر پارٹی کے جانب سے ملک میں پٹرول ڈیزل کی بڑھتی ہوئی قیمتوں کے خلاف شہر کے سبھاش چوک سے ڈپٹی کمشنر آفس تک ایک احتجاجی ریلی نکالی گئی۔
ڈپٹی کمشنر کے توسط سے ایک یاداشت ریاستی وزیر اعلی بی ایس یدی یورپا کو روانہ کی گئی جس میں مطالبہ کیا گیا کہ پٹرول اور ڈیزل کی بڑھتی ہوئی قیمتوں پر قابو پایا جائے۔
انہوں نے کہا کہ پٹرول اور ڈیزل مہنگا ہونے کے سبب کھانے کے تیل کی قیمتیں بھی آسمان کو چھو رہی ہیں جس کی وجہ سے عام لوگوں کو کافی مشکلات کا سامنا کرنا پڑ رہا ہے۔
اس لیے مرکزی و ریاستی حکومت سے ہمارا مطالبہ ہے کہ پٹرول ڈیزل ، پکوان گیس ، پکوان کے تیل کی بڑھتی ہوئی قیمتوں کو جلد از جلد قابو میں لائے تاکہ عام لوگوں کو راحت نصیب ہو۔
