پولس نے بتایا کہ چھتیس گڑھ کے نارائن پور ضلع میں ماؤنوازوں کی طرف سے آئی ای ڈی کے دھماکے میں انڈو تبت بارڈر پولس کا ایک اسسٹنٹ سب انسپکٹر رینک کا افسر ہلاک ہوگیا ہے۔
یہ واقعہ آئی ٹی بی پی کے سونپور کیمپ سے تین کلومیٹر کے فاصلے پر پیش آیا۔ نارائن پور کے سپرنٹنڈنٹ آف پولیس سدانند کمار نے بتایا کہ "اتراکھنڈ کے ٹہری گڑھوال ضلع کے رہنے والے اے ایس آئی راجندر سنگھ پیر کو ماؤنوازوں کے ایک ہائی پریشر آئی ای ڈی دھماکے میں ہلاک ہو گئے۔"
اس دھماکے میں ہیڈ کانسٹیبل مہیش بھی زخمی ہو گئے ہیں اور انہیں علاج کے لیے ریاستی دارالحکومت رائے پور لے جایا جائے گا۔
یہ دھماکہ پیر کی صبح 8:30 بجے اس وقت ہوا جب 53 بٹالین آئی ٹی بی پی کی ایک کمپنی سونپور اور دھونڈاریبیڈا گاؤں کے درمیان گشت کر رہی تھی۔ معاملے کی تحقیقات شروع کر دی گئی ہے۔
