ایک جانب ملک میں کورونا وائرس کے متاثرہ مریضوں کی تعداد میں بے تحاشہ اضافہ ہو رہا ہے تو وہیں، ملک کی مختلف ریاستوں میں ہونے والی انتخابی سرگرمیاں نہیں رُک رہی ہیں جو حکومت کے ان تمام دعوؤں کی قلعی کھول رہی ہیں جس میں وہ کورونا کے تعلق سے سنجیدگی کا اظہار کر رہی ہے۔
ایک جانب حکومت کہتی ہے کہ کورونا وائرس کی دوسری لہر انتہائی خطر ناک ہے تو وہیں، وہ اُن سیاسی اور انتخابی سرگرمیوں کو روکنے میں نہ صرف ناکام ہے بلکہ وہ خود بھی انتخابی ریلی کے نام پر ہجوم اکٹھا کر رہی ہے۔
کورونا وائرس کی دوسری لہر کے بعد اگر ہم ہسپتالوں کا جائزہ لیں یا کووڈ سینٹرز کی تصاویر اور ویڈیوز دیکھیں تو واقعی اسے دیکھنے کے بعد رونگٹے کھڑے ہوجائیں گے۔
کورونا وبا کی وجہ سے حکومت نے اسکول اور کالجز کو تو بند رکھنے کا اعلان کیا ہے جبکہ کئی شہروں میں لاک ڈاؤن کے اقدام کئے گئے ہیں اور اس طرح کے کام کرکے حکومت یہ جتانا چاہتی کہ وہ کورونا وبا کی روک تھام کے لیے کتنی سنجیدہ ہے لیکن تصویر کا دوسرا پہلو یہ ہے کہ یہی حکومت انتخابات کے نام پر ریلیاں کر رہی ہے اور ہجوم اکٹھا کرنے کا کوئی بھی موقع نہیں گنوا رہی ہے۔
