افغانستان کے قندھار میں بھارت کے قونصل خانے سے تقریباً 50 سفارت کاروں اور سکیورٹی اہلکاروں کو سکیورٹی کی خراب صورتحال اور طالبان کے جنوبی افغان شہر کے نئے علاقوں پر کنٹرول حاصل کرنے کے پیشِ نظر خصوصی طیارے کی مدد سے بھارت واپس لایا گیا ہے۔
تاہم سفارتی ذرائع نے بتایا ہے کہ افغانستان کے قندھار میں بھارتی قونصل خانہ بند رکھنے کی اطلاعات غلط ہیں۔
وزارت خارجہ کے ترجمان ارندم باگچی نے واضح کیا کہ قندھار میں بھارت کے قونصل خانے میں تعینات بھارتی ملازمین کو افغانستان میں سرکاری سکیورٹی فورسز اور طالبان کے مابین شدید تشدد کے دوران عارضی طور پر واپس بلا لیا گیا ہے، اور مقامی عملہ کے ذریعہ مشن کام کر رہا ہے۔
باگچی نے مزید کہا ”بھارت افغانستان میں تیزی سے بدلتے سیکورٹی حالات پر باریکی سے نظر رکھے ہوا ہے۔ ہمارے ملازمین کی حفاظت سب سے اوپر ہے۔ قندھار میں بھارتی قونصل خانہ بند نہیں کیا گیا ہے۔ تاہم قندھار کے قریب شدید لڑائی کی وجہ سے بھارتی ملازمین کو فی الحال واپس بلایا گیا ہے۔“
انہوں نے کہا ”میں اس بات پر زور دینا چاہتا ہوں کہ حالات مستحکم ہونے تک یہ ایک مکمل طور پر عارضی اقدام ہے۔ بھارتی مشن مقامی عملہ کے توسط سے چلایا جارہا ہے۔ ویزا اور قونصلر خدمات کابل میں سفارتخانے کے ذریعہ فراہم کی جارہی ہیں۔“
ترجمان نے کہا کہ افغانستان کا ایک اہم شراکت دار کی حیثیت سے ہندوستان ایک پرامن ، خودمختار اور جمہوری افغانستان کے لیے پرعزم ہے۔
اس سے قبل بھارت نے اشارہ دیا تھا کہ اگر سکیورٹی کی صورتحال مزید خراب ہوجاتی ہے، کیونکہ طالبان پیش قدمی کررہے ہیں اور مزید صوبوں پر قبضہ کررہے ہیں تو وہ افغانستان سے اپنے شہریوں اور اہلکاروں کو واپس لائے گا۔
تاہم عہدیداروں نے کہا تھا کہ بھارت افغانستان میں بگڑتی ہوئی سکیورٹی صورتحال پر سخت نگرانی کررہا ہے اور اس بات کو یقینی بنانے کے لیے تمام اقدامات کرے گا کہ بھارتی عہدیداروں اور عام شہریوں کو کسی قسم کا نقصان نہ پہنچے۔
یہ بھی پڑھیں: کابل ایئرپورٹ کی سکیورٹی کے 'دائرہ کار' پر ترکی اور امریکہ متفق
قندھار اور مزار میں قونصل خانوں کے ساتھ بھارت کا کابل میں اپنا سفارت خانہ ہے جہاں اس میں 500 سے زائد عملہ تعینات ہے۔
قابل غور بات یہ ہے کہ 31 اگست تک افغانستان سے امریکی فوجیوں کا مکمل انخلاء ہوجائے گا اور طالبان بجلی کی تیز رفتار سے نئے اضلاع اور علاقوں پر قبضہ کررہے ہیں جس کے نتیجے میں افغان سرکاری فوج بھی وہاں کی متعدد جگہوں سے فرار ہورہی ہے۔ طالبان کا دعویٰ ہے کہ انھوں نے افغانستان کے 85 فیصد حصے پر قبضہ کرلیا ہے۔
