دہلی ہائی کورٹ نے دہلی تشدد معاملے میں معلومات لیک ہونے کے خلاف دائر درخواست کی سماعت ملتوی کردی ہے۔
اس کیس میں آصف اقبال تنہا نے 8 ستمبر کو سماعت کے دوران کہا تھا کہ جب وہ حراست میں تھے اور ان کی ضمانت کی درخواست زیر التوا تھی اور چارج شیٹ بھی دائر نہیں کی گئی تھی، تب ہی نیوز چینلز کے پرائم ٹائم پر ڈسکلوزر اسٹیٹمنٹ دکھائے جا رہے تھے۔ اس لیے دہلی پولیس ہی معلومات لیک کرنے کی ذمہ دار ہے۔
آصف اقبال کی جانب سے ایڈووکیٹ وجے اگروال نے کہا تھا کہ جولائی میں جسٹس ویبھو بکھرو کے حکم کے بعد دہلی پولیس نے اس حوالے سے کوئی پریس بیان جاری نہیں کیا لیکن ہم دہلی پولیس اور دیگر ایجنسیوں کی جانب سے معلومات کے لیک ہونے پر آنکھیں بند نہیں کرسکتے۔
وہیں 11 اگست کوعدالت نے دہلی پولیس کو تحریری دلائل داخل کرنے کی ہدایت دی تھی۔ دراصل 5 اگست کو دہلی پولیس نے عدالت کو بتایا تھا کہ اس نے کئی صحافیوں سے معلومات لیک ہونے کے بارے میں پوچھ گچھ کی تھی۔
دہلی پولیس نے عدالت کو بتایا تھا کہ کسی بھی صحافی نے اپنے ذرائع بتانے سے انکار کر دیے۔ دہلی پولیس نے کہا تھا کہ تفتیش کے دوران یہ نہیں پتہ چل سکا کہ متعلقہ معلومات میڈیا تک کیسے پہنچی۔
عدالت نے دہلی پولیس سے کہا کہ آپ اس سلسلے میں جو بھی کہنا چاہتے ہیں، آپ اسے تحریری طور پر دائر کریں۔ عدالت نے دہلی پولیس سے کہا کہ آپ اس کی تحقیقات کرنا چاہتے ہیں یا نہیں، یہ بھی بتائیں۔
پانچ مارچ کو ہائی کورٹ نے دہلی پولیس کو پھٹکار لگاتے ہوئے کہا تھا کہ آصف کے بارے میں معلومات لیک کرنے کا معاملہ اب صرف الزام نہیں ہے۔
یہ الزامات میڈیا میں شائع ہونے کے بعد یہ الزام صحیح ثابت ہو گئے ہیں۔ پھر دہلی پولیس کی جانب سے وکیل امیت مہاجن نے کہا تھا کہ معلومات لیک کرنے کا الزام پولیس پر نہیں لگایا جا سکتا۔
یہ بھی پڑھیں: شہر کا گلا گھونٹ دیا، اب اندر آنا چاہتے ہیں: سپریم کورٹ
اس کے بعد عدالت نے ملزم تنہا کو ایک اضافی حلف نامہ داخل کرنے کی ہدایت دی تھی۔ گذشتہ یکم مارچ کو سماعت کے دوران عدالت نے دہلی پولیس کو نامکمل رپورٹ داخل کرنے پر سرزنش کی تھی۔
فی الحال دہلی ہائی کورٹ نے دہلی تشدد معاملے میں معلومات لیک ہونے کے خلاف دائر درخواست کی سماعت ملتوی کردی ہے۔ جسٹس مکتہ گپتا کی بنچ کی عدم دستیابی کی وجہ سے سماعت ملتوی کی گئی ہے۔
