کولکاتا: پیر سے لوکل ٹرینوں میں ہاکرز کے داخلے پر پابندی عائد

مغربی بنگال میں آئندہ سوموار سے لوکل ٹرینوں میں ہاکرز کے داخلے پر پابندی عائد کردی گئی ہے۔ آئندہ کل سے ہاکرز ٹرینوں میں سامان فروخت نہیں کر پائیں گے۔

ریاست میں حکومت اور محکمۂ صحت کی جانب سے نئی کورونا گائڈ لائنز جاری کرتے ہوئے آئندہ سوموار سے لوکل ٹرینوں میں ہاکرز کے داخلے پر روک لگادی گئی ہے. آئندہ کل سے ہاکرز ٹرینوں میں سامان فروخت نہیں کر پائیں گے۔ مشرقی ریلوے کے مطابق کورونا وائرس کی تیسری لہر کے مدنظر لوکل ٹرینوں میں ہاکرز کے داخلے پر وقتی طور پر پابندی عائد کرنے کا فیصلہ کیا گیا ہے، یہ ہدایت آئندہ نوٹیفکیشن تک جاری رہے گی۔

انہوں نے کہا کہ ہاوڑہ ڈویژن میں ہاکرز کے ٹرینوں میں داخلے پر پابندی عائد کی گئی ہے۔ اس کے بعد سیالدہ ڈویژن میں بھی اس کا تجربہ کیا جاسکتا ہے۔ وہیں دوسری جانب آر پی ایف ہاوڑہ کے مطابق سوموار سے ہاکرز کو لوکل ٹرینوں پر سوار ہونے سے روکنے کا سخت فیصلہ کیا گیا ہے۔

انہوں نے کہا کہ ہاکرز اگر اس کی خلاف ورزی کرتے ہیں تو ان کے خلاف سخت کارروائی کی جائے گی اور جرمانہ بھی عائد کیا جائے گا۔ مزدور یونین آئی این ٹی ٹی یو سی نے آر پی ایف کے اس فیصلے کی مخالفت کی ہے اور کہا کہ سوموار سے ہاوڑہ اسٹیشن کے سامنے ہاکرز کی حمایت میں تحریک چلائی جائے گی۔

انہوں نے کہا کہ لاک ڈاؤن کے دوران نہ جانے کتنے لوگ بے روزگار ہوگئے ہیں۔ ہاکرز کے پاس لوکل ٹرینوں میں سامان فروخت کرکے گھر چلانے کا واحد ذریعہ تھا لیکن اسے چھیننے کی کوشش کی جارہی ہے۔

واضح رہے کہ مغربی بنگال میں کورونا وائرس کے مریضوں کی کل تعداد 15 لاکھ 42 ہزار 347 تک پہنچ چکی ہے۔ اس بیماری سے اب تک 15 لاکھ 14 ہزار 475 لوگ صحتیاب ہوچکے ہیں۔

اس طرح ریاست میں اب تک کورونا وائرس سے ہلاک ہونے والوں کی تعداد 18 ہزار 356 تک پہنچ چکی ہے۔