آل انڈیا کانگریس کے جنرل سکریٹری اور اتراکھنڈ کانگریس کے سینیئر رہنما ہریش راوت نے اوھم سنگھ نگر کے نانکمَتّا پہنچ کر گرودوارہ صاحب میں جمعہ کے روز جھاڑو لگایا اور جوتے صاف کیے۔ اس دوران انہوں نے ماتھا ٹیک کر اپنے متنازع بیان کے لیے معافی مانگی اور اپنے حریف بی جے پی کے رہنما پر تنقید بھی کی۔
کانگریس کے پنجاب انچارج ہریش راوت گذشتہ دنوں اس وقت تنازع میں آ گئے تھے جب انہوں نے پنجاب کانگریس کے رہنماؤں کا تقابل 'پنچ پیاروں' سے کر دیا تھا۔ اس کے بعد اس معاملے میں تنازع کھڑا ہو گیا۔
سیاسی جماعتوں نے اسے سکھ سماج کے جذبات کے خلاف قرار دے دیا تھا۔ اس بیان کے بعد کانگریس اور ہریش راوت تنقید کی زد میں آگئے۔ انہوں نے سوشل میڈیا کے ذریعے گرودوارہ صاحب میں معافی مانگی اور اپنے بیان پر افسوس کا اظہار کیا تھا۔
مزید پڑھیں:۔ پنجاب: ہریش راوت کے خلاف فوجداری مقدمہ درج کئے جانے کا مطالبہ
ہریش راوت آج اتراکھنڈ ریاست تحریک کے شہدا کی سرزمین کھٹیمہ پہنچے اور یہاں سے انہوں نے بی جے پی حکومت کے خلاف 'پریورتن یاترا' کا آغاز کیا۔ یہاں سے وہ براہ راست نانکمَتّا گرودوارہ صاحب پہنچے اور انہوں نے یہاں جھاڑو لگایا اور جوتے صاف کیے۔ ساتھ ہی ماتھا ٹیک کر معافی بھی مانگی۔
(یو این آئی)
