گاندھی نگر: گجرات کے انسداد دہشت گردی اسکواڈ (اے ٹی ایس) اور انڈین کوسٹ گارڈ نے پانچ ایرانی شہریوں کو گرفتار کیا ہے اور ان کے قبضے سے 425 کروڑ روپے سے زیادہ مالیت کی منشیات بھی برآمد کی ہے۔ حکام کے مطابق گرفتاریاں اور منشیات کی برآمدگی پیر کی رات میں کی گئی۔ اس آپریشن کو اے ٹی ایس اور انڈین کوسٹ گارڈ نے بھارت کے پانیوں میں منشیات کی اسمگلنگ سے متعلق مخصوص انٹیلی جنس معلومات کے بعد شروع کیا تھا۔ مشترکہ ٹیم نے مشتبہ حالات میں اوکھا بندرگاہ سے چند سو سمندری میل دور بحیرہ عرب میں ایک ایرانی کشتی کو ماہی گیری کرتے دیکھا جس کے بعد مشترکہ ٹیم نے مشتبہ کشتی کو پکڑنے میں کامیاب رہی اور اس میں سوار پانچ ایرانی شہریوں کو حراست میں لے لیا۔
یہ بھی پڑھیں:
کشتی کی تلاشی لینے پر مشترکہ ٹیم نے 61 کلو منشیات برآمد کی ہے، ایک اہلکار نے بتایا کہ منشیات کی مارکیٹ ویلیو 425 کروڑ روپے سے زیادہ بتائی جاتی ہے۔ گجرات کے ڈیفنس پی آر او نے ایک ٹویٹ میں کہا کہ کشتی کو مزید تفتیش کے لیے اوکھا لایا جا رہا ہے۔ ایک اہلکار نے بتایا کہ یہ کارروائی انڈین کوسٹ گارڈ، آئی سی جی ایس میرامبھن اور آئی سی جی ایس ابھییک جہازوں نے منشیات کی اسمگلنگ سے متعلق انٹیلی جنس معلومات کی بنیاد پر کی تھی۔ ملزمان سے بھارت میں منشیات کی اسمگلنگ کے سلسلے کا پردہ فاش کرنے کے لیے پوچھ گچھ کی جائے گی۔ قابل ذکر ہے کہ گزشتہ 18 مہینوں میں، کوسٹ گارڈ اور اے ٹی ایس نے مشترکہ کارروائی کرتے ہوئے 407 کلو منشیات ضبط کی ہیں جن کی مارکیٹ قیمت 2,355 کروڑ روپے ہے۔
