انجینئرنگ کالجوں کے داخلے کے لیے ہونے والے مشترکہ داخلہ امتحان جے ای ای مینس مارچ 2021 کے نتائج کا اعلان کردیا گیا ہے۔ اس داخلہ جاتی امتحان میں تاریخ رقم کرنے والی طالبہ کاویہ چوپڑا نے 300 میں سے 300 نمبر حاصل کیے ہیں۔کاویہ دہلی کی رہنے والی ہیں لیکن وہ کوٹہ سے انجینئرنگ داخلہ امتحان کے لیے کوچنگ کر رہی تھیں۔
کاویہ کا کہنا ہے کہ فروری اٹیمپٹ میں بھی میں نے 99.97 فیصد حاصل کیے تھے لیکن میرا ہدف تھا کہ میں 99.98 فیصد سے زیادہ اسکور کروں، اس لیے میں نے جے ای ای مینس مارچ میں دوبارہ امتحان دیا تھا۔ پہلی کوشش میں میں نے فزکس اور کیمسٹری پر زیادہ توجہ دی تھی لیکن کیمسٹری میں میرے کم نمبر آئے تھے۔ اس کے بعد میں نے 15 دنوں تک کیمسٹری پر زیادہ توجہ دی اور مارچ میں دوبارہ کوشش کی۔
کاویہ نے کہا کہ انہوں نے دسویں جماعت میں 97.6 فیصد حاصل کیے تھے۔ میں 11 ویں جماعت میں نیشنل اسٹینڈرڈ ایگزامینیشن ان اسٹرانامی (این ایس ای اے) اور نویں جماعت سے متستقل طور سے ریجنل میتھس اولمپیاڈ(آر ایم او) میں کوالیفائی کر رہی ہوں۔ دسویں جماعت میں انڈین جونئیر سائنس اولمپیاڈ (آئی این جے ایس او) کوالیفائی کرنے کے بعد ممبئی کے ہومی جہانگیر بھابھا سینٹر میں منعقد کیمپ میں بھی شامل ہوئی تھی۔
آئی او کیو پی، آئی او کیو سی اور آئی او کیو ایم تینوں کوالیفائی کرچکی ہوں۔ میں روزانہ 7 سے 8 گھنٹے تک پڑھتی ہوں اور تینوں موضوع کو برابر وقت دیتی ہوں۔ ایسے مقابلہ جاتی امتحان کے لیے کوٹہ کا ماحول بہتر ہے لہذا میں نے جے ای ای مینس کی تیاری کے لیے کوٹہ آنے کا فیصلہ لیا۔
کاویہ نے کہا کہ کوٹہ میں کئی تجربہ کار ٹیچر موجود ہیں، جو آپ کی پوری مدد کرتے ہیں۔مستقبل میں آئی آئی ٹی ممبئی سی ایس برانچ سے بی ٹیک کرنے کے بعد سافٹ ویئر انجینئیر بننا چاہتی ہوں۔ میرے والد وکاس چوپڑا انجینئر ہیں، اس لیے میری بھی دلچسپی انجینئرنگ میں اپنا مستبقل بنانے کی ہے۔
