اگرتلہ: تریپورہ میں پولیس نے اگرتلہ میونسپل کارپوریشن کے کونسلر ابھیشیک دتہ کے خلاف آرمس ایکٹ کے تحت مقدمہ درج کیا ہے۔ کونسلر دتہ بھارتیہ جنتا پارٹی (بی جے پی) کے ایم ایل اے اور شہر کے رام نگر حلقے سے پارٹی کے امیدوار سورج جیت دتہ کے بھتیجے ہیں۔ پیشے سے وکالت کرنے والے اور کانگریس مارکسسٹ حمایت یافتہ آزاد امیدواروں پرشوتم رائے برمن اور سشمیتا پال نے الزام لگایا ہے کہ یہ واقعہ دن کے اجالے میں شہر کے وسط میں بنرجی پاڑا علاقے میں اس وقت پیش آیا جب وہ جمعرات کو اپنے چیمبر سے نکلی تھیں۔
کارپوریٹر دتہ کی قیادت میں تقریباً 40 سے 50 شرپسندوں نے پستول دکھا کر ان کا راستہ روکا اور مبینہ طور پر ہراساں کیا۔ اس کے علاوہ جان سے مارنے کی دھمکیاں بھی دیں۔ سب ڈویژنل پولیس آفیسر (ایس ڈی پی او، صدر) اجوئے داس نے کہا کہ مغربی اگرتلہ پولیس اسٹیشن میں دونوں طرف سے تین شکایات درج کی گئیں اور دونوں طرف سے ملزمین کو نوٹس بھیجے گئے۔ ایس ڈی پی او داس نے کہاکہ پولیس نے جائے واقع سے تمام ڈیجیٹل ثبوت اکٹھے کر لیے ہیں۔ ڈیوٹی پر موجود سیکورٹی اہلکاروں سے موصول ہونے والی اطلاعات کی بنیاد پر مزید تفتیش شروع کر دی گئی ہے۔
وہیں کونسلر دتہ نے الزام لگایا کہ سشمیتا پال رام نگر حلقہ سے ایک آزاد امیدوار کو ووٹ دینے کے لیے اس علاقے کے لوگوں میں پیسے تقسیم کر رہی ہیں، جو کہ غیر اخلاقی ہے، اس لیے انہوں نے ایسی کوششوں کو روکنے کی کوشش کی۔ لیکن ان پر جھوٹے الزام لگائے گیے۔ وہیں سی پی آئی (ایم) نے الزام لگایا کہ جنوبی تریپورہ، سپاہیجالا اور مغربی تریپورہ اضلاع کے کچھ علاقوں میں بی جے پی کے غنڈے ہر رات ووٹروں کو ڈرا رہے ہیں۔ معاملہ مقامی پولیس کے علم میں لانے کے باوجود تاحال کوئی کارروائی نہیں کی گئی۔
یواین آئی
