اپنی انقلابی شاعری سے نوجوانوں کے دلوں پر حکمرانی کرنے والے شاعر عمران پرتاپ گڑھی کو کانگریس پارٹی کی جانب قومی اقلیتی سیل کا چیئرمین منتخب کیا گیا ہے۔ اس سے متعلق ای ٹی وی بھارت کے نمائندے نے ان سے خاص بات چیت کی۔
شاعری کی دنیا سے سیاست میں قدم رکھنے والے عمران پرتاپ گڑھی نے کہا کہ راہل گاندھی اور پارٹی کے اعلی رہنماؤں نے مجھ پر بھروسہ جتاتے ہوئے یہ ذمہ داری سونپی ہے اب میری پوری کوشش رہے گی کہ میں اپنے عہدے سے انصاف کر سکوں اور اعلیٰ کمان کی کسوٹی پر کھرا اتر سکوں۔
انہوں نے مزید کہا کہ راہل گاندھی نے میری آواز کو طاقت بخشی ہے، میں جس طرح پہلے آواز بلند کیا کرتا تھا اب اس سے کہیں زیادہ طاقت سے آواز اٹھا سکوں گا۔
عمران پرتاپ گڑھی کو کانگریس کے قومی اقلیتی سیل کے چیئرمین منتخب کیے جانے کے بعد جہاں انہیں مبارکباد پیش کرنے کے لیے مسلسل پیغامات بھیجے جا رہے ہیں، وہیں ایک طبقہ ایسا بھی ہے جو ان کے انتخاب پر نکتہ چینی بھی کر رہا ہے اس کے جواب میں عمران پرتاپ گڑھی نے کہا کہ میرے بارے میں یہ سب کہنا جلد بازی ہوگی ابھی تو میں نے عہدہ بھی نہیں سنبھالا ہے۔
سینٹرل وسٹا پروجیکٹ کی آڑ میں 4 مساجد کو شہید کیے جانے کی خبر پر عمران پرتاپ گڑھی نے کہا کہ ہم مودی کے اس محل کی تعمیر کے دوران کسی بھی مذہبی مقامات خاص کر مسجدوں کو نقصان پہنچانے نہیں دیں گے اور جو بھی قانونی کارروائی ہے اس کو اپنایا جائے گا۔
