ریاست مغربی بنگال کے دارالحکومت کولکاتا کے جنوب میں واقع مسلم اکثریتی تجارتی علاقہ توپسیا اور جنوبی 24 پرگنہ میں نواب واجد علی شاہ کی نگری میٹیا برج، گارڈن ریچ، خضرپور اور بھانگوڑ میں لگائے گئے کیمپوں کے باہر لوگوں کی بھیڑ دیکھنے کو ملی۔
اس کے علاوہ مسلم اکثریتی ضلع شمالی 24 پرگنہ، مالدہ، شمالی دیناج پور، جنوبی دیناج پور، مالدہ، مرشدآباد، مشرقی مدنی پور، ہوڑہ اور ہگلی ضلع میں لوگ 'دوارے اسکیم' کا فائدہ اٹھانے کے لئے کیمپوں کے باہر رات سے ہی لائن میں کھڑے ہیں۔
شمالی 24 پرگنہ، جلپائی گوڑی اور علی پور دوار میں گھر گھر اسکیم کے تحت لگائے گئے کیمپوں کے باہر عام لوگوں اور انتظامیہ کے درمیان حجت و تکرار کی بھی خبریں موصول ہوئی ہیں۔
بعض مقامات پر پولیس اہلکاروں کو حالات پر قابو پانے کے لئے لاٹھی چارج کرنی پڑی ہے۔ شمالی 24 پرگنہ کے مدھم گرام میں دوارے سرکار کیمپ میں بھگدڑ مچنے سے ایک ضعیفہ زخمی ہوگئیں۔
مزید پڑھیں:۔ مغربی بنگال: عوام کی ترقی ہماری اولین ترجیحات میں شامل: کابینی وزیر
واضح رہے کہ دوارے سرکار اسکیم کے تحت مغربی بنگال حکومت کے اعلیٰ افسران جیسے ضلع مجسٹریٹ، ایڈیشنل ضلع مجسٹریٹ، ایس ڈی پی او، بی ڈی او اور ضلع پولیس سپرنٹنڈنٹ کی نگرانی میں کیمپ کا انعقاد کیا جاتا ہے جہاں عام لوگوں کے مسائل دور کیے جاتے ہیں. اس کے علاوہ حکومت کے ترقیاتی منصوبوں سے عام لوگوں کو راست طور پر جوڑا جاتا ہے۔
