موصولہ اطلاع کے مطابق بس میں 50 کے قریب مسافرین تھے۔ یہ بس سیکٹر 16 A پر واقع فلم سٹی فلائی اوور کے قریب سے گذر رہی تھی۔ اس دوران بس بے قابو ہوکر الٹ گئی۔ اس حادثے میں 3 مسافروں کو زیادہ چوٹیں آئیں۔ ٹریفک پولیس نے موقع پر پہنچ کر تینوں زخمیوں کو علاج کے لئے ضلع اسپتال میں داخل کرایا۔ بہت سے دوسرے مسافروں کو ہلکی پھلکی چوٹیں آئی ہیں۔ ان کا موقع پر ہی علاج کرایا گیا۔
بس کے پلٹنے کے نتیجہ میں مسافرین گھبراگئے، بس ڈرائیور کو انہوں نے اس کا ذمہ دار قرار دیا، کچھ مسافروں کا کہنا ہے کہ بس ڈرائیور نے دہلی سے نوئیڈا میں داخل ہوتے ہی رفتار بڑھا دی۔ تیز رفتاری کے سبب بس بے قابو ہوگئی اور الٹ گئی۔ حادثے کے بعد ڈرائیور اور دیگر عملہ موقع سے فرار ہوگیا۔
