دہلی کی ایک عدالت نے دہلی کے چھترسال اسٹیڈیم میں پہلوان ساگر کے قتل کے معاملے میں دو مرتبہ کے اولمپک میڈل جیتنے والے پہلوان سشیل کمار کو جمعہ کو عدالتی حراست کی مدت 9 جولائی تک بڑھادی ہے۔
سشیل کی حراست کی مدت آج ختم ہونے کے بعد انہیں عدالت کے سامنے پیش کیا گیا۔ جہاں عدالت نے ایک مرتبہ پھر پہلوان کی عدالتی حراست کی مدت چودہ دن اور بڑھادی ہے۔ جیل انتظامیہ کو حکم دیا گیا ہے کہ سشیل کو 9 جولائی کو پھر عدالت کے سامنے پیش کیا جائے۔
روہنی میں واقع میٹروپولیٹن مجسٹریٹ مینک اگروال کی عدالت کے سامنے سشیل کمار پہلوان کی پیشی ہوئی۔ اس معاملے میں جانچ افسر نے عدالت کے سامنے ملزم کی عدالتی حراست کی مدت بڑھانے کی اپیل کی جسے عدالت نے منظور کر لیا۔
یہ بھی پڑھیے
آج ہی کے دن بھارتی کرکٹ ٹیم نے تاریخی کارنامہ انجام دیا تھا
واضح رہے کہ سشیل پر قتل، غیر ارادتا قتل اور اغوا کا الزام ہے۔ ان کے ساتھ نو دیگر لوگ بھی عدالتی حراست میں ہیں۔ پولس کے مطابق سشیل کمار ودیگر پر مبینہ جائیداد کے تنازعہ کے سلسلے میں اپنے ساتھیوں کے ساتھ مل کر چار مئی اور پانچ مئی کے درمیان اسٹیڈیم میں ساگر دھن کھڑ اور اس کے دوستوں کی پٹائی کی تھی۔ بعد میں 23 سالہ ساگر کی چوٹوں کی وجہ سے موت ہوگئی تھی۔
