ٹینیسی سیلاب سے 20 سے زائد افراد ہلاک، 50 لاپتہ

ٹینیسی میں ہفتے کے آخر میں آئے سیلاب سے ہلاکتوں کی تعداد 20 سے تجاوز کرگئی ہے اور 50 سے زائد افراد ابھی لاپتہ بتائے گئے ہیں۔ امریکی میڈیا نے یہ اطلاع دی ہے۔

این بی سی نے اتوار کو ہیمپفریز کاؤنٹی شیرف کرس ڈیوس کے حوالے سے بتایا کہ مرنے والے 21 افراد میں جڑواں بچے بھی شامل ہیں۔

دریں اثناء نیو یارک ٹائمز نے اتوار کو بتایا کہ ٹینیسی میں آئے سیلاب میں تقریباً 22 افراد ہلاک ہوگئے اور 50 دیگر لاپتہ ہیں۔

ہیمپفریز کاؤنٹی شیرف کے دفتر کے نائب سربراہ راب ایڈورڈز نے نیویارک ٹائمز کو بتایا کہ ہلاک شدگان میں سات ماہ کے جڑواں بچوں سمیت کئی بچے بھی شامل ہیں۔

امریکی صدر جو بائیڈن نے اتوار کو ٹینیسی میں سیلاب سے متاثرہ افراد سے تعزیت کا اظہار کرتے ہوئے ضروری امداد کا وعدہ کیا۔

میڈیا رپورٹوں کے مطابق ہیمپفریز کاؤنٹی میں ہفتے کے روز دیہی سڑکیں اور شاہراہیں سیلاب کے پانی سے بند ہوگئی ہیں جب کہ کئی گھر ڈوب گئے ہیں اور 4000 سے زائد گھروں کی بجلی سپلائی متاثر ہوگئی ہے۔ ٹینیسی ایمرجنسی مینجمنٹ ایجنسی نے ہفتہ کو ہنگامی حالت کا اعلان کیا۔

(یو این آئی)