دہلی کے لیفٹیننٹ گورنر انل بیجل کو لکھے خط میں ڈاکٹر کمار نے کہا کہ دہلی میں کورونا وبا کی دوسری لہر میں آکر بہت سے خاندان اجڑ گئے ہیں، ہزاروں خواتین بیوہ ہوگئی ہیں اوربہت سارے بچوں کے سر سے والدین کا سایہ اٹھ گیا ہے۔
انہوں نے کہا کہ ایسی خواتین جن کے گھر میں کورونا سے ان کے کام کاجی شوہر کی موت ہوئی اس خاندان کو ایک مشت پانچ لاکھ روپے کی امدادی رقم حکومت کے ذریعہ دی جائے اورساتھ ہی ایسی خواتین جنہوں نے کورونا کے سبب اپنے شوہر کو کھودیا ہے انہیں دہلی حکومت کی جانب سے بیوہ پنشن کی شکل میں پانچ ہزار روپے ماہانہ مالی مدد دی جائے۔ اس میں کسی کی عمر اور متاثرہ خاندان کی آمدنی کی کوئی حد نہ رکھی جائے جس سے متاثرین کو سہولت ملے۔
انہوں نے یہ مطالبہ بھی کیا کہ ایسی خواتین کے بچے اوربچیوں کو حکومت کے ذریعہ ابتدائی تعلیم کے لئے دوہزار روپے ماہانہ اوراعلیٰ تعلیم کے لئے چارہزار روپے ماہانہ امدادی رقم دہلی حکومت کے ذریعہ دی جائے۔ اس کے ساتھ ہی ان بچوں کوکالج اورہاسٹل میں ترجیحات کی بنیادپر داخلہ دیا جائے۔
قابل ذکر ہے کہ ایسی اسکیمیں کانگریس کی حکمرانی والی ریاستوں جیسے راجستھان اور دیگر ریاست میں پہلے سے نافذ ہیں۔
یواین آئی
