بنگلور: ریاست کرناٹک میں ہونے والے انتخابات کی تاریخ کا اعلان ہو گیا ہے۔ الیکشن کمیشن کی جانب سے اعلان کیا گیا کہ مئی 10 تاریخ کو انتخابات ہوں گے اور 13 تاریخ کو نتائج کا اعلان ہوگا۔ اس سلسلے میں کرناٹک کے رہنماؤں نے اپنے رد عمل کا اظہار کیا۔ کانگریس کے لیڈر سرجے والا نے کہا کہ آنے والے انتخابات میں کانگریس بی جے پی کی حکومت کو اکھاڑ پھینکے گی اور کانگریس کی قیادت والی حکومت تشکیل دی جائے گی۔
وہیں بی جے پی رہنما ایم پی شوبھا کرندلاجے نے کہا کہ بھارتیہ جنتا پارٹی نے ریاست کرناٹک میں کبھی اکثریت حاصل نہیں کی لیکن اس بار وہ امید کرتی ہیں کہ انہیں اکثریت ملے گی اور دوبارہ ڈبل انجین سرکار قائم ہوگی۔ اس موقع پر سابق وزیراعلیٰ سدارامیا نے کہا کہ وہ آنے والے انتخابات میں مضبوطی سے لڑیں گے اور عوام کی خواہشات کے مطابق عمدہ قیادت فراہم کریں گے۔
الیکشن کمیشن آف انڈیا نے آج کرناٹک اسمبلی انتخابات کی تاریخوں کا اعلان کر دیا ہے۔ الیکشن کمیشن کے افسران نے بدھ کو دہلی کے پلینری ہال، وگیان بھون میں ایک پریس کانفرنس کی۔ اس پریس کانفرنس کے دوران الیکشن کمشنر آف انڈیا انوپ چندر پانڈے، چیف الیکشن کمشنر راجیو کمار اور ای سی آئی ارون گوئل نے کرناٹک اسمبلی انتخابات کے حتمی شیڈول کا اعلان کیا۔
کرناٹک انتخابات کی تاریخوں کے اعلان کے بعد کانگریس پارٹی آئندہ انتخابات کے لیے باقی امیدواروں کے ناموں کو حتمی شکل دینے کا امکان ہے۔ کرناٹک کانگریس کے سربراہ ڈی کے شیوکمار اور پارٹی کے دیگر کارکنان 100 امیدواروں کو حتمی شکل دینے کے لیے بنگلورو میں اسکریننگ کمیٹی کی میٹنگ کریں گے۔
یہ بھی پڑھیں: Karnataka Assembly Elections 2023 سدارامیا صرف ایک سیٹ سے الیکشن لڑیں گے
کرناٹک کانگریس نے پہلے ہی مہینے کے شروع میں اعلان کردہ 124 سیٹوں کی پہلی فہرست میں چھ خواتین امیدواروں اور آٹھ اقلیتی امیدواروں کو ٹکٹ دینے کا اعلان کیا ہے۔ سابق وزیر اعلیٰ سدارامیا اور ریاستی پارٹی صدر ڈی کے شیوکمار کے نام پہلی فہرست میں شامل ہیں۔ سدارامیا ورنا حلقہ سے انتخاب لڑیں گے جبکہ ڈی کے شیوکمار کنکا پورہ سے امیدوار ہوں گے۔
