نئی دہلی: دہلی پولیس نے ریسلنگ فیڈریشن آف انڈیا (WFI) کے سبکدوش ہونے والے صدر اور بی جے پی کے رکن پارلیمنٹ برج بھوشن شرن سنگھ کے خلاف چارج شیٹ داخل کی ہے۔ داخل کی گئی چارج شیٹ میں کہا گیا ہے کہ دہلی پولیس کے پاس ثبوت کے طور پر دو تصاویر ہیں، جن میں برج بھوشن شرن سنگھ کو شکایت کنندہ پہلوان کی طرف بڑھتے ہوئے دکھایا گیا ہے۔ یہ تصاویر شکایت کنندہ کی جانب سے بیان کردہ مقام اور گواہ کے بیان کردہ مقام سے بھی میچ کرتی ہے۔
چارج شیٹ میں کہا گیا ہے کہ تصاویر کا ایک سیٹ بھی دستیاب ہے جو اس تقریب میں برج بھوشن کے موجودگی کی تصدیق کرتی ہے جہاں جنسی ہراسانی کا مبینہ واقعہ پیش آیا تھا۔ یہ چارج شیٹ میں تکنیکی ثبوت کا حصہ ہے۔ ساتھ ہی چارج شیٹ میں کہا گیا ہے کہ شکایات کے مطابق دارالحکومت کے اشوکا روڈ پر واقع ڈبلیو ایف آئی کے دفتر، برج بھوشن شرن سنگھ کے گھر اور جنسی ہراسانی کے کم سے کم دو واقعات کے جائے وقوعہ پر نہ تو کوئی وزیٹر رجسٹر تھا اور نہ ہی کوئی سی سی ٹی وی کیمرہ تھا۔
یہ بھی پڑھیں:
- برج بھوشن شرن سنگھ کو عدالت میں پیش ہونے کا حکم
- برج بھوشن کا خواتین ریسلرز کے ساتھ نامناسب رویہ رہتا تھا، انٹرنیشنل ریسلنگ ریفری
چارج شیٹ میں یہ بھی ذکر کیا گیا ہے کہ ڈبلیو ایف آئی کے عہدیداروں نے پولیس نوٹس کا جواب دیتے ہوئے چار تصاویر فراہم کیں جن میں برج بھوشن اور شکایت کنندہ کی بیرون ملک (قزاقستان) میں موجودگی دکھائی گئی ہے۔ چارج شیٹ میں کہا گیا ہے کہ دو تصویروں میں وہ شکایت کنندہ کی طرف بڑھتے ہوئے نظر آرہے ہیں۔ گواہوں کے کالز ڈیٹیل ریکارڈ (سی ڈی آر) کے ساتھ ڈبلیو ایف آئی کی طرف سے فراہم کردہ ریسلنگ ایونٹس کی تصاویر کی بنیاد پر چارج شیٹ نے یہ نتیجہ اخذ کیا کہ برج بھوشن سنگھ مبینہ بدسلوکی کے مقامات پر موجود تھے۔ جس کا ذکر چھ میں سے پانچ متاثرین کی شکایت میں کیا گیا ہے۔ قابل ذکر ہے کہ ملک کے مشہور و معروف خواتین پہلوان کھلاڑیوں نے بی جے پی کے رکن پارلیمنٹ برج بھوشن کی کے خلاف جنسی زیادتی کا الزام عائد کیا ہے۔
