مہاراشٹر کے سابق وزیر داخلہ انل دیشمکھ کی ضمانت کی درخواست سی بی آئی عدالت نے مسترد کر دی ہے۔ عدالت کے اس فیصلے کے بعد اب یہ واضح ہو گیا ہے کہ انل دیشمکھ اس بار بھی جیل کی سلاخوں کے اندر ہی دیوالی منائیں گے۔ دراصل انل دیشمکھ نے 100 کروڑ روپے کی وصولی کے معاملے میں ضمانت کے لیے سی بی آئی کورٹ میں درخواست دی تھی۔ حالانکہ انہیں اسی معاملے میں ای ڈی کے تحت درج کیس میں ضمانت مل گئی ہے۔ Anil Deshmukh Bail Plea Rejected
ای ڈی سے ضمانت ملنے کے بعد دیشمکھ نے سی بی آئی کورٹ میں ضمانت کی اپیل بھی دائر کی تھی۔ تاہم دونوں فریقوں کی دلیلیں سننے کے بعد آج سی بی آئی عدالت نے فیصلہ سناتے ہوئے انل دیشمکھ کی ضمانت کی درخواست کو مسترد کر دیا۔ سی بی آئی کی خصوصی عدالت کے جج ایس ایچ گوالانی نے جمعرات کو دونوں فریقین کے دلائل مکمل ہونے کے بعد ضمانت کی درخواست پر فیصلہ محفوظ کر لیا تھا۔ نیشنلسٹ کانگریس پارٹی (این سی پی) کے رہنما کو 2 نومبر 2021 کو گرفتار کیا گیا تھا اور وہ فی الحال عدالتی حراست میں ہیں۔ دیشمکھ کو گزشتہ ہفتے ' انجیوگرافی' کے لیے ایک نجی اسپتال میں داخل کرایا گیا تھا۔
