حیدرآباد: بھارت راشٹرا سمیتی (بی آر ایس) کی سینئر رہنما اور ایم ایل سی کے کویتا دہلی شراب پالیسی کیس کے سلسلے میں جمعرات کو پوچھ گچھ کے لیے انفورسمنٹ ڈائریکٹوریٹ (ای ڈی) کے سامنے پیش ہوں گی۔ تلنگانہ کے وزیراعلی کے چندر شیکھر راؤ (کے سی آر) کی بیٹی کے کویتا ایک ہفتے سے بھی کم عرصے میں دوسری بار پوچھ گچھ کے لیے ای ڈی کے سامنے پیش ہوں گی۔ بتادیں کہ کے کویتا سے ہفتے کے روز نو گھنٹے تک پوچھ گچھ کی گئی تھی۔ سپریم کورٹ نے ان کی درخواست پر فوری سماعت کی درخواست کو قبول کرتے ہوئے دہلی شراب پالیسی کیس میں ای ڈی کی طرف سے جاری سمن کے خلاف عبوری راحت کی عرضی 24 مارچ تک ملتوی کردی۔
چیف جسٹس ڈی وائی چندرچوڑ اور جسٹس پی ایس نرسمہا پر مشتمل بنچ نے کویتا کی عرضیوں کا نوٹس لیا اور ان کی عرضی کی سماعت 24 مارچ کو کرنے پر اتفاق کیا۔ درخواست کی فوری سماعت کا مطالبہ کرتے ہوئے کویتا کے وکیل نے کہا کہ کیا کسی خاتون کو انفورسمنٹ ڈائریکٹوریٹ کے دفتر میں طلب کیا جا سکتا ہے؟ یہ مکمل طور پر قانون کے خلاف ہے۔ بتادیں کہ ایجنسی کے سامنے پیش ہونے سے پہلے کویتا نے پارٹی کارکنوں سے ملاقات کی۔ ان کے بھائی اور وزیر کے ٹی راما راؤ نے کے سی آر کی دہلی کی رہائش گاہ پر ان سے ایک مختصر ملاقات کی۔
