عرفان خان نے نہ صرف بالی وڈ بلکہ ہالی وڈ میں بھی اپنے بااثر اور مضبوط اداکاری سےمداحوں کا محظوظ کیا ہےلیکن انہیں بچپن میں فلمیں دیکھنے کی اجازت نہیں تھی۔
عرفان خان نے ایک بار بتایا تھا کہ'میرا بچپن جے پور میں گزرا اور والدین کا گھر ٹونک میں تھا۔ جب وہاں ہم جاتے تھے تو اپنے ہم عمر ساتھیوں کے ساتھ ڈرامہ کیا کرتے تھے۔
بچپن میں فلمیں دیکھنے کی اجازت نہیں تھی۔ جب کبھی چاچا سال میں ایک دو بار آیا کرتے تھے تو سبھی خوش ہو جاتے تھے۔ چاچا فلم دکھانے لے جایا کرتے تھے۔ وہ کچھ پیسے دیتے تھے اور سارا خاندان فلم دیکھنے جایا کرتا تھا'۔
عرفان نے کہا تھا کہ' ٹونک میں جہاں میری خالہ کا گھر تھا وہ سنیما ہال کے بالکل سامنے تھا۔ تو جیسے ہی خالہ کے گھر کا دروازہ کھلتا تھا تو سیدھا سنیما پڑتا تھا۔ وہاں ٹکٹ بیچنے والی عورت سے خالہ کے مراسم تھے اس لئے فلم کے درمیان میں ہی ہم لوگ جا کر بیٹھ جایا کرتے تھے اور فلم دیکھتے تھے۔
