راہل گاندھی نے ایک بیان میں ریاست کے وزیراعلی شیوراج سنگھ چوہان کی قیادت والی بھارتیہ جنتا پارٹی حکومت پر سخت نکتہ چینی کرتے ہوئے ٹویٹ کیا 'ہماری لڑائی اسی سوچ اور نا انصافی کے خلاف ہے'۔
اس کے ساتھ ہی انہوں نے پولیس بربریت کا ویڈیو بھی پوسٹ کیا ہے۔ بتایا جارہا ہے کہ یہ مدھیہ پردیش کے گنا میں دلت کسان کنبوں کے ساتھ پولیس کے ظلم کا وائرل ہوا ویڈیو ہے۔
ویڈیو میں پولیس دستے دلت کنبوں کی خواتین اور بچوں پر ڈنڈے برسا رہے ہیں اور لات گھونسوں سے ان کی پٹائی کر رہے ہیں۔
اس واقعہ پر مسٹر گاندھی اور محترمہ واڈرا کے شیوراج حکومت پر سخت حملے کے بعد کسان کانگریس کے نائب صدر سرینر سولنکی نے وزیراعظم نریندر مودی کو خط لکھ کر اس واقعہ کے قصورواروں کو سخت سزا دینے کی مانگ کرتے ہوئے اس واقعہ کو انسانی حقوق کی سخت خلاف ورزی قرار دیا۔
انہوں نے کہاکہ مسٹر چوہان کے اقتدار سنبھالنے کے بعد ریاست میں غریبوں، کسانوں اور دلتوں پر مظالم کے واقعات بہت بڑھ گئے ہیں اور گنا جیسا واقعہ پہلے کبھی نہیں ہوا۔
مسٹر سولنکی نے کہا کہ گنا میں منگل کو کسان سے زمین پر قبضہ چھڑانے گئی پولیس۔انتظامیہ کی ٹیم کو متاثرہ کسان نے بتایا تھا کہ وہ قبضہ دار نہیں ہے، بنٹائی سے زمین لی ہے، دولاکھ کا قرض ہے۔ پولیس نے اس کی گزارش نہیں سنی، میاں۔بیوی اور ان کے بچوں پر بے رحمی سے لاٹھیاں برسائی گئیں۔
انہوں نے سوال کیا کہ پریشان کسان کے ساتھ وحشی پن کیا مناسب ہے۔ قانون ہاتھ میں لیکر میاں بیوی اور معصوم بچوں کی بے رحمی سے پٹائی کہاں کا انصاف ہے۔ کیا یہ سب اس لئے کیا گیا کہ وہ ایک دلت اور غریب کسان ہے۔
