بھارت کے سابق اسپین گیندباز بشن سنگھ بیدی نے گذشتہ روز کہا کہ مہندر سنگھ دھونی ٹیم کے آدھے کپتان ہیں۔
انہوں نے کہا 'میں حیران ہوں کہ دھونی کو کیوں آرام دیا گیا، جبکہ ان کی کمی گذشتہ میچ میں صاف طور پر نظر آئی۔'
بیدی نے کہا کہ دھونی میدان پر اپنی بہترین حکمت عملی کے لیے جانے جاتے ہیں اور جب وہ میدان میں ہوتے ہیں تو کوہلی کو ان سے کافی مدد ملتی ہے۔ وہ ٹیم میں آدھے کپتان کی حیثیت رکھتے ہیں۔
انہوں نے ٹیم انتظامیہ پر تنقید کرتے ہوئے کہا کہ عالمی کپ سے پہلے اس طرح کے تجربات نہیں کرنا چاہیے، ہمیں اپنا روایتی کھیل کھیلنا چاہیےکیوں کہ عالمی کپ شروع ہونےمیں ابھی تقریباً ڈھائی مہینے کا وقت باقی ہے اور فی الحال ہمیں موجودہ کھیل پر توجہ دینا چاہیے۔
بیدی نے آئی پی ایل پر بھی اپنی رائے پیش کرتے ہوئے کہا کہ آئی پی ایل میچ بھارتی کھلاڑیوں کے لیے نقصان دہ ثابت ہو سکتا ہے۔
انہوں نے کہا کہ آئی پی ایل کے دوران کھلاڑی زخمی ہو سکتے ہیں جس کی وجہ سے عالمی کپ میں بھارت کو پریشانی کا سامنا کرنا پڑ سکتا ہے۔
