ششی تھرور نے ہیگڑے کے بیان کی مذمت کی

ششی تھرور نے سابق مرکزی وزیر اور بی جے پی رہنما اننت کمار ہیگڑے کے بابائے قوم مہاتما گاندھی کے بارے میں دیئے گئے متنازع بیان کی مذمت کی ہے۔

کانگریس کے سینئر رہنما ششی تھرور نے پارلیمنٹ کے احاطے میں نامہ نگاروں سے بات چیت کے دوران ایک سوال کے جواب میں کہا 'وہ بی جے پی رہنما اننت کمار ہیگڑے کے بیان کی مذمت کرتے ہیں اور اس بیان پر وزیر اعظم نریندر مودی کو اپنا رخ سامنے رکھنا چاہیے'۔

ہیگڑے کا یہ بیان جس میں انہوں نے کہا کہ مہاتما گاندھی کی آزادی کی لڑائی ’ایک ڈرامہ تھا‘ اس پر تھرور نے کہا 'بی جے پی اور سنگ پریوار شروع سے ہی مہاتما گاندھی پر حملے کرتا رہا ہے اور یہ اس کی تاریخ رہی ہے اور اس میں کچھ بھی نئی بات نہیں ہے'۔

انہوں نے کہا 'وزیراعظم نریندرمودی ایک طرف مہاتما گاندھی کے اصولوں کی بات کرتے ہیں جبکہ دوسری طرف ان کی پارٹی کے رہنما اور سنگ پریوار کے لوگ گاندھی کی توہین کرتے ہیں اور ان پر حملے کرتے رہتے ہیں، لیکن وزیر اعظم مودی کچھ نہیں بولتے'۔

کانگریسی رہنما نے یہ بھی کہا 'وزیراعظم کو اس معاملے میں اپنا رخ واضح کرنا چاہئے تاکہ ملک کو پتہ چل سکے کہ ان کا رخ کیا ہے۔'

انہوں نے کہا کہ مسٹر مودی کی کتھنی اور کرنی میں کافی فرق ہے، وہ بولتے کچھ ہیں اور ان کی پارٹی کے رہنما کرتے کچھ ہیں'۔

مسٹر تھرور نے مزید کہا 'مودی حکومت کے وزیر لوگوں کو گولی مارنے کی بات کرتے ہیں اور اس طرح نوجوانوں کو تشدد کے لئے بھڑکاتے ہیں لیکن ان پر کوئی کارروئای نہیں ہوتی ہے۔ بابائے قوم مہاتما گاندھی کانگریس کے لئے ہمیشہ سے ہی عزت معاب اور آج بھی قابل احترام ہیں جبکہ بی جے پی کے لئے وہ کبھی قابل احترام نہیں رہے ہیں اور ہیگڑے کے بیان سے یہ واضح ہو گیا ہے۔