ان کا کہنا ہے کہ گنگا اتنی صاف ہوگئی ہے کہ ماریشس کے وزیراعظم ڈبکی لگانے سے خود کو روک نہ سکے۔
یوگی نے اسی تعلق سے کہا کہ ماریشس کے وزیراعظم پراواند جوگناوت گنگا کی صفائی دیکھ کر اس قدر خوش ہوئے کہ وہ ڈبکی لگانے سے خود کو روک نہیں پائے۔
یوگی آدتیہ ناتھ کے مطابق 2013میں جب ماریشس کے وزیراعظم بھارت آئے تھے تو گنگا کو آلودہ اور خستہ دیکھ کر ڈبکی لگائے بنا ہی واپس چلے گئے۔
یوگی نے ایک پریس کانفرنس میں گنگا کی بہتر اور صاف ستھری حالت کی سراہنا کرتے ہوئے کہا کہ یہ سب وزیراعظم نریندر مودی کی وجہ سے ہوا ہے۔
انہوں نے مزید کہا کہ اس سال 3200 این آر آئیز نے کمبھ میں حصہ لیا اور اس سال پہلی بار 70 ملکوں کے سفیروں نے کمبھ میلے کا جائزہ لیا اور یہاں منعقدہ مذہبی تقریبات میں شرکت کی۔ ایسا پہلے کبھی نہیں ہوا۔
خیال رہے کہ اترپردیش میں منعقدہ کمبھ میلا دنیا کا سب سے بڑا مذہبی میلا ہے جس میں دنیا بھر کے رہنے والے ہندو یہاں آکر میلے میں شریک ہوتے ہیں اور گنگا میں ڈبکی لگا کر خود کو پاک کرتے ہیں۔ ان کا عقیدہ ہے کہ گنگا میں ڈبکی لگانے سے ان کے سارے گناہ دھل جائیں گے۔ یہ 55 دنوں کا ہوتا ہے جس کا اختتام 4 مارچ کو ہوا۔
