ان کے ساتھ پنجاب کے وزیر اعلیٰ کیپٹن امریندر سنگھ سمیت دیگر سینئر کانگریسی رہنما موجود تھے۔
راہل گاندھی جلیاں والا باغ کا بھی آج دورہ کریں گے، جہاں وہ جلیاں والا باغ سانحہ میں ہلاک ہونے والے افراد کو خراج عقیدت پیش کریں گے۔
سنہ 1919 میں برطانوی دور حکومت میں جلیاں والا باغ کا سانحہ پیش آیا تھا۔
امرتسر کے جلیاں والا باغ میں کچھ افراد برطانوی حکومت کے نئے ٹیکس اور بھارتیوں کی فوج میں جبری بھرتی کے خلاف احتجاج کر رہے تھے۔ اس موقع پر عوام کی ایک بڑی تعداد بیساکھی کے میلے میں شرکت کے لیے وہاں موجود تھی۔ حکومت کی جانب سے وہاں مارشل لا نافذ کر دیا تھا۔
جلیاں والا باغ میں ہجوم کو منتشر کرنے کے لیے جنرل آر ای ایچ ڈائر کو بھیجا گیا تھا، جنھوں نے عوام کو متنبہ کیے بغیر گولی چلانے کا حکم دیا اور گولی ختم نہ ہونے تک سپاہی فائرنگ کرتے رہے۔
