وزیر اعظم نریندر مودی نے گجرات کے کیوڑیا میں خطاب کے دوران پاکستان کی پارلیمنٹ میں پلوامہ حملے کے اعتراف کا ذکر کیا اور پلوامہ حملے پر سوال اٹھانے والوں پر جم کر نکتہ چینی کی۔
خطاب کے دوران انہوں نے یہ بھی کہا کہ جب میں یہاں نیم فوجی دستوں کی پریڈ دیکھ رہا تھا تب من میں ایک اور تصویر تھی اور یہ تصویر پلوامہ حملے کی تھی۔
مودی نے کہا کہ' ملک کبھی بھول نہیں سکتا جب بیٹوں کے جانے سے پورا ملک غمگین تھا تب کچھ لوگ اس غم میں شامل نہیں ہوئے تھے اور وہ پلوامہ حملے میں اپنا سیاسی فائدہ دیکھ رہے تھے'۔
وزیراعظم نے مزید کہا کہ' گزشتہ دنوں پڑوسی ملک سے جو خبریں آئی ہیں، جس طرح سے وہاں کی پارلیمنٹ میں اعتراف کیا گیا، اس نے ان لوگوں کے اصلی چہرے کو بے نقاب کردیا ہے۔ اپنے سیاسی فائدے کے لیے یہ لوگ کس حد تک جاسکتے ہیں پلوامہ حملہ اس کی بڑی مثال ہے'۔
واضح رہے کہ وزیراعظم نریندر مودی کے گجرات دورے کا آج دوسرا دن ہے۔ اس موقع پر انہوں نے مجاہد آزادی سردار ولبھ بھائی پٹیل کے یوم پیدائش پر کیوڑیا میں واقع ان کے مجسمہ پر جاکر انھیں خراج عقیدت پیش کیا۔
