وزیراعظم نریندر مودی آج بہار میں چار ریلیوں سے کریں گے خطاب

بہار میں وزیراعظم نریندر مودی کی آمد سے قبل پختہ حفاظتی انتظامات کیے جارہے ہیں اور اس تعلق سے تمام تر تیاریاں تقریباً مکمل ہوچکی ہیں۔

بہار اسمبلی انتخابات کے دوسرے مرحلے کی ووٹنگ تین نومبر کو ہوگی اور آج دوسرے مرحلے کی انتخابی تشہیر کا آخری دن ہے۔

بی جے پی کی انتخابی تشہیر کو فائنل ٹچ دینے کے لیے وزیراعظم نریندر مودی آج بہار دورے پر آرہے ہیں جس کے بعد وہ چھپرا، سمستی پور، مشرقی اور مغربی چمپارن میں انتخابی ریلیوں سے خطاب کریں گے۔

سمستی پور اور ایک دیگر اسمبلی حلقے میں انتخابی تشہیر کے دوران ریاست کے موجودہ وزیراعلی نتیش کمار بھی وزیراعظم مودی کے ساتھ ہوں گے۔

وزیراعظم کی آمد کے مد نظر بہار میں سخت حفاظتی انتظامات کیے گئے ہیں اور انتخابی ریلیوں سے متعلق تمام تر تیاریاں مکمل ہوچکی ہیں، جن جگہوں پر ریلیاں کی جائیں گی وہاں سماجی دوری اور کورونا سے متعلق تمام اصولوں کو دھیان میں رکھتے ہوئے عوام کے بیٹھنے کے لیے کرسیاں لگائی گئی ہیں۔

واضح رہے کہ تین نومبر 2020 کو ریاست کے 16 اضلاع کی 94 سیٹوں پر ووٹنگ ہوگی اور نتائج 10 نومبر کو ظاہر کیے جائیں گے۔