گجرات کے شہر احمدآباد کے گومتی پور علاقے میں تقریبا دو سال سے میٹرو ریل پروجیکٹ کا کام جاری ہے اور یہاں انڈر گراونڈ (زیر زمین) ریلوے اسٹیشن تعمیر کیا جارہا ہے۔
حالانکہ لاک ڈاؤن کے دوران اس پروجیکٹ کو عارضی طور پر روک دیا گیا تھا لیکن اب رواں ماہ سے اس پر دوبارہ سے کام شروع کردیا گیا ہے۔
اس پروجیکٹ کے انڈر گراؤنڈ ہونے سے زمین میں بار بار گڑھے کھودے جارہے ہیں جس کی وجہ سے یہاں کی ہوا گرد آلود ہوچکی ہے اور علاقے کے لوگ اس سے کافی پریشان ہیں۔
مقامی لوگوں کا کہنا ہے کہ میٹرول ریل کے زیر زمین پروجیکٹ کی وجہ سے کبھی کبھی گٹروں کا پانی باہر نکل آتا ہے اور عوام کو آنے جانے کے لیے طرح طرح کی تکالیف کا سامنا کرنا پڑتا ہے۔
اس کے علاوہ انڈر گراونڈ ریلوے اسٹیشن تعمیر کرنے کے لیے یہاں زمین کی کھدائی اور بڑی بڑی مشین نصب کرنے کا کام جاری ہے جس کی وجہ سے اکثر لوگوں کے گھر کبھی بھی ہلنے لگتے ہیں، حتی کہ چند گھروں میں دراڑ تک پڑگئی ہے جس سے اب ان کے گھروں کے جلد ہی گر جانے کا خطرہ منڈلا رہا ہے۔
مقامی لوگوں کا یہ بھی کہنا ہے کہ میٹرو ریل پروجیکٹ کے لیے یہاں بڑی بڑی مشین نصب کی گئی ہیں اور یہاں دن رات کام چلتا رہتا ہے اور اس کے باعث ان کی نیند میں خلل پڑتا ہے۔
ان سب معاملات کی وجہ سے گومتی پور کے لوگوں نے حکومت سے مطالبہ کیا ہے کہ میٹرو ریل پروجیکٹ کے سبب یہاں کے لوگوں کا جو نقصان ہورہا ہے انھیں اس کا معاوضہ ادا کیا جائے اور پروجیکٹ کو جلد از جلد پورا کیا جائے۔
