راجستھان میں نیم سرکاری اساتذہ کی جنگ اب سڑکوں سے وزیراعلی اشوک گہلوٹ کے گھر تک پہنچنے والی ہے۔ نیم سرکاری اساتذہ نے ہاتھوں میں کٹورا لے کر بطور احتجاج بھیک تک مانگ لی ہے اور 29 جولائی کو سی ایم ہاؤس کے گھیراؤ کا بھی اعلان کر دیا ہے۔
ریاست راجستھان میں اب مدرسہ کے نیم سرکاری اساتذہ کا غصہ حکومت کے خلاف اس قدر بڑھ گیا ہے کہ وہ بطور احتجاج ہاتھوں میں کٹورا لے کر بھیگ مانگنے کے بعد اب سی ایم ہاؤز کا گھیراؤ کرنے کی تیاری کررہے ہیں۔
راجستھان مدرسہ بورڈ کو نیم سرکاری اساتذہ نے 22 جولائی کو ایک خط لکھا جس میں انہوں نے کہا تھا کہ اگر ان کے مطالبات پورے نہیں کئے گئے تو اساتذہ کی جانب سے سخت احتجاج کیا جائے گا۔
نیم سرکاری اساتذہ نے جئے پور ، جودھپور ، اجمیر ڈیویژن سمیت کئی شہروں میں کانگریس حکومت کے خلاف احتجاج کرتے ہوئے سڑک پر جھاڑو لگائی اور کٹورا لے کر بھیک بھی مانگی ہے۔
خاتون اساتذہ نے واضح کیا کہ اگر کانگریس حکومت نے ان کے مطالبات نہیں مانے تو اگلے انتخابات میں اس حکومت کو سبق سکھایا جائے گا۔ نیم سرکاری اساتذہ نے 29 جولائی کو راجستھان کے وزیر اعلی اشوک گھلوٹ کے گھر کا گھیراؤ کرنے کا بھی اعلان کیا۔
