کشمیر پر بھارتی موقف مسترد: پاکستان

بھارتی وزارت خارجہ کی طرف سے ایک بیان میں کہا گيا تھا کہ کشمیر بھارت کا داخلی مسئلہ ہے اور بھارتی آئین ہمیشہ مقدم تھا، ہے اور رہے گا۔

اس کے رد عمل میں پاکستانی وزرات خارجہ نے بھارتی موقف کو مسترد کرتے ہوئے کہا کہ مسئلہ کشمیر اقوام متحدہ کی قراردادوں میں موجود ہے اور یہ بھارت کا داخلی نہیں بلکہ دو طرفہ مسئلہ ہے۔

پاکستانی وزارت خارجہ کے ترجمان ڈاکٹر فیصل نے کہا کہ 'مسئلہ کشمیر کو اقوام متحدہ کے قراردادوں کے مطابق حل ہونا چاہیے اور پاکستان کشمیریوں کی اخلاقی، سفارتی اور سیاسی حمایت جاری رکھے گا۔'

انہوں نے کہا کہ کشمیر کے حالات انتہائی مخدوش ہیں اور پوری وادی کو جیل بنا دیا گیا ہے۔

ڈاکٹر فیصل نے کہا کہ پاکستان اپنا ہائی کمشنر بھارت نہیں بھیجے گا۔

کرتارپور راہداری کے حوالے سے جب ڈاکٹر فیصل سے پوچھا گیا تو انھوں نے کہا کہ راہداری منصوبہ جاری رہے گا، پاکستان تمام مذاہب کا احترام کرتا ہے۔
اس بیان سے چند گھنٹے قبل ہی بھارت نے پاکستان کی جانب سے تجارتی تعلقات ختم کرنے اور سفارتی تعلقات محدود کرنے کے فیصلے کو حیران کن قرار دیا تھا۔