افغانستان کے دارالحکومت کابل کے گرین زون کی مشہور مسجد میں حملے میں امام کے ساتھ متعدد شہری ہلاک ہو گئے۔
افغان حکام نے حملہ کی ذمے داری طالبان پر عائد کی ہے۔ مجموعی طور پر آج دھماکوں اور حملوں میں نو افراد ہلاک ہوگئے۔ ابھی تک مسجد میں ہونے والے دھماکے کی ذمے داری کسی نے قبول نہیں کی۔
شہر کے محفوظ ترین علاقے میں ہونے والے اس دھماکے کی آواز دور دور تک سنی گئی اور قریب ہی واقع سفارتخانوں اور بین الاقوامی دفاتر میں دھماکے کے بعد سائرن بجنے لگے اور عملہ محفوظ کمروں کی جانب روانہ ہو گئے۔
ملک کی وزارت داخلہ کے ترجمان طارق آریان نے کہا کہ 'بدقسمتی سے شدت پسندوں نے وزیر اکبر خان مسجد میں دھماکہ خیز مواد کے ذریعے حملہ کیا۔ یہ مسجد گرین زون کے داخلی دروازے پر واقع ہے'۔
انہوں نے کہا ہے کہ 'اس انتہائی سیکورٹی کے حامل علاقے میں واقع مسجد میں لوگ دونوں طرف سے داخل ہو سکتے ہیں اور اہم رہنما اکثرعید کی نماز یہاں ادا کرتے ہیں'۔
