بنگلور کے سروگنہ نگر میں ہندو اور مسلمان کے ایک گروپ نے اس شدت کی گرمی میں راہگیروں کو تھنڈا شربت پلانے کا انتظام کیا تھا۔
یہ قابل ستائش قدم ایسے وقت میں اٹھایا گیا ہے جب پورے ملک میں چند شرپسند عناصر ملک کی فضا خراب کرنے کی کوشش کر رہے ہیں۔
اس موقع پر یاسین خیمنی نامی شخص نے بتایا کہ اس طرح کا پروگرام ہم تمام مذاہب کے تہوار کے موقع پر کرتے ہیں، حتی کہ عید میلادالنبی کے موقع پر ہندو بھائی جلوس میں بھی شریک ہوتے ہیں۔
شیوراج گوڈا نامی شخص نے ای ٹی وی بھارت سے بات کرتے ہوئے کہا کہ صرف رام نومی ہی نہیں بلکہ رمضان المبارک کے ماہ میں بھی روزہ داروں کے لیے افطاری کا انتظام کیا جاتا ہے جبکہ کرسمس کے موقع پر بھی مختلف پروگرام کا انعقاد کیا جاتا ہے۔
اس موقع پر ان نوجوانوں کے گروہ کے سربراہ اور ثقافتی تنظیم کرناٹکا رکشنا ویدیکے کے صدر پروین شیٹی نے کہا کہ ہماری تنظیم ایک سیکولر پلیٹ فارم ہے جہاں ہر مذہب کے ماننے والے ہیں، اس تنظیم کے تمام کارکنان آپس میں بہت ہی پیار و محبت سے رہتے ہیں اور ایک دوسرے کی مدد کرتے ہیں اور معاشرے میں تبدیلی لانے و امن بحال کرنے کی جدوجہد میں لگے رہتے ہیں۔
