بھارتی جنتا پارٹی نے اس مرتبہ کئی سینیئر رہنماؤں کو ٹکٹ نہیں دیا جن میں لال کرشن اڈوانی اور مرلی منوہر جوشی کا نام قابل ذکر ہے۔
مرلی منوہر جوشی کو بی جے پی جنرل سیکریٹری رام لال نے پارٹی کا فیصلہ سنایا اور کہا کہ آپ پارٹی دفتر آکر ازخود اعلان کریں کہ آپ الیکشن نہیں لڑنا چاہتے ہیں۔
لیکن منوہر جوشی نے اس بات سے انکار کر دیا اور کہا کہ اگر پارٹی چاہتی ہے کہ میں یہ انتخابات نہیں لڑوں تو کم از کم پارٹی صدر کو آکر مجھے بتانا چاہیے تھا۔
مرلی منوہر جوشی نے کانپور میں اپنے حامیوں کے نام ایک خط لکھا اور مختصر الفاظ میں انہیں یہ جانکاری دی کہ پارٹی نے انہیں اس الیکشن میں امیدوار نہیں بنایا ہے۔
منوہر جوشی نے بس اتنا ہی لکھا کہ،' پارٹی نے اس مرتبہ مجھے کانپور سے الیکشن نہیں لڑنے کے لیے کہا ہے۔'
واضح رہے کہ اس سے قبل لال کرشن اڈوانی کو بھی پارٹی نے ٹکٹ نہیں دیا اور ان سے کہا گیا کہ تھا کہ آپ پارٹی دفتر آکر ازخود اعلان کریں کہ آپ الیکشن نہیں لڑنا چاہتے ہیں، لیکن اڈوانی نے ایسا کرنے سے انکار کر دیا۔
