وزیراعظم نریندر مودی نے بھارتی قومی سرمایہ کاری کو فروغ دینے والی ایجنسی انویسٹ انڈیا کو اقوام متحدہ انویسٹمنٹ پروموشن ایوارڈ 2020 جیتنے پر مبارکباد دی۔
نریندر مودی نے منگل کو ایک ٹویٹ پیغام میں کہا کہ ’’انویسٹ انڈیا کو اقوام متحدہ کا انویسٹمنٹ پروموشن ایوارڈ 2020 جیتنے پرمبارکباد۔ یہ ہماری حکومت کے ذریعہ بھارت کو دنیا کی سب سے پرکشش سرمایہ کاری کی منزل بنانے اور تجارت میں آسانی کو بہتر بنانے کے لئے کئے گئے کام کا ثبوت ہے‘‘۔
واضح رہے کہ اقوام متحدہ کے ادارے (یو این سی ٹی اے ڈی) نے انویسٹ انڈیا کو اقوام متحدہ کے انوسٹمنٹ پروموشن ایوارڈ 2020 کا فاتح قرار دیا ہے۔ ایوارڈ کی تقریب پیر کو جنیوا میں ادارہ کے صدر دفتر میں منعقد ہوئی۔
یہ ایوارڈ دنیا بھر میں سرمایہ کاری کو فروغ دینے والی ایجنسیوں کی بہترین روایات، طریقہ کار اور کامیابیوں کے جائزہ کی بنیاد پر دیا جاتا ہے۔ اس بار اقوام متحدہ کے ادارہ نے 180 سرمایہ کاری کو فروغ دینے والی ایجنسیوں کے کام کاج کا جائزہ لیا تھا۔
(یو این آئی)
