این آر سی میں لاکھوں لوگوں کی شہریت مشکوک ہوجانے اور پھر پارلیمنٹ میں مذہبی جانبداری پر مشتمل شہریت ترمیمی بل لانے کے خلاف آسام میں مخالفتوں کا سلسلہ جاری ہے۔ اسے آسام کے لوگ برداشت نہیں کریں گے۔ ایسا کہنا ہے اے آئی یو ڈی ایف کے سربراہ اور رکن پارلیمنٹ مولانا بدرالدین اجمل کا، جو سرمائی اجلاس میں شہریت بل پر حکومت کو گھیرنے کی تیاری کر رہے ہیں۔
مولانا اجمل نے ای ٹی وی بھارت کے سوالات کا جواب دیتے ہوئے کہا کہ حکومت نے جس طرح زور زبردستی سے طلاق اور کشمیر کا قانون منظور کروالیا، ہو سکتا ہے کہ شہریت ترمیمی بل بھی منظور کرالے، مگر ہم اس کی مخالفت سے باز نہیں آئیں گے، بلکہ پوری طاقت سے پارلیمنٹ اور سڑک پر اس کی مخالفت کریں گے۔
ایک سوال کے جواب میں مولانا نے کہا کہ تھوڑے وقت کے فائدے کے لئے حکمران طبقہ آئین کے ساتھ کھلواڑ کر رہا ہے، مگر ان کو معلوم ہونا چاہیے کہ یہ جمہوریت ہے، یہاں زور زبردستی زیادہ دن نہیں چلتی۔
