درجنوں کتابوں کے مصنف، معروف عالمِ دین، بے باک خطیب اور صوبائی جمعیت کے نائب ناظم مولانا عبد المنان سلفی كا آج درمیانی شب انتقال ہوگیا۔
مولانا عبدالمنان سلفی نیپال کے جھنڈانگر میں واقع دینی مدرسہ جامعہ سراج العلوم السلفیہ کی جانب سے شائع ہونے والا رسالہ ماہنامہ 'السراج کے ایڈیٹر تھے۔
بتادیں کہ مولانا مرحوم ضلعی جمعیت اہل حدیث سدھارتھ نگر، نیپال کے ناظم بھی تھے۔
مشرقی یوپی میں صوبائی جمعیت اہل حدیث کے خادم مولانا شہاب الدین جلال الدین المدنی نے مولانا کی وفات پر بڑے دکھ اور غم کا اظہار کیا ہے۔
انہوں نے کہا ہے کہ 'مولانا عبد المنان سلفی کی وفات علمی دنیا کے لئے ایک عظیم خسارہ ہے'۔
مولانا المدنی نے کہا ہے کہ 'مولانا عبد المنان سلفی بڑے ہی ملنسار، انسان دوست اور ملی ہمدردی سے متصف تھے'۔
انہوں نے کہا ہے کہ 'ہماری رفاقت تین دہائیوں سے زیادہ پر مشتمل ہے اور اس طویل عرصہ میں ہم دونوں ایک دوسرے کے لئے دو جسم اور ایک جان کی مانند رہے'۔
مدرسہ جامعہ سراج العلوم السلفیہ کی جانب سے جاری کی گئی ایک ریلیز کے مطابق مولانا کی نماز جنازہ آج بعد نماز ظہر مدرسہ کے احاطہ میں ادا کی جائے گی اور ان کی تدفین جھنڈانگر کے قدیم قبرستان میں عمل میں آئے گی۔
