جمعۃ الوداع لاک ڈاؤن کی نذر، مساجد ویران

جمعۃ الوداع جو اپنے ساتھ بہت ساری رونقیں لے کر آتا ہے اور اس دن مساجد نمازیوں سے بھری ہوتی ہیں لیکن اس بار کورونا وبا کی وجہ سے مساجد سُنسان نظر آئیں۔

لاک ڈاؤن کے سبب مساجد میں محدود تعداد میں نمازیوں کو عبادت کرنے کی اجازت ہے اس لیے ایک وقت کی نماز میں پانچ افراد ہی نماز ادا کرسکتے ہیں۔

قومی دارالحکومت دہلی کی جامع مسجد میں بھی نمازی نظر نہیں آئے حالاںکہ سڑکوں پر ہلکی چہل پہل نظر آئی لیکن ان کے چہروں پر مساجد میں نماز نا پڑھنے کا غم ضرور دکھائی دیا۔

اس کے علاوہ ریاست تلنگانہ کی تاریخی مکہ مسجد بھی اپنی ویرانی پر آنسو بہاتی نظر آئی جس کا سبب کورونا وائرس اور لاک ڈاؤن تھا، مکہ مسجد کے اطراف کا پورا علاقہ مکمل طور پر بند اور سنسان دکھائی دیا جبکہ سخت پولیس بندوبست بھی دیکھنے کو ملا۔

مقامی لوگوں کا کہنا ہے کہ انہوں نے مکہ مسجد میں جمعہ کی نماز میں ایسی خاموشی 13 برس قبل اس وقت دیکھی تھی جب یہاں بم بلاسٹ ہوا تھا لیکن آج پھر ایسا وقت آیا جب انہیں نماز جمعہ ادا کرنے کے لیے مکہ مسجد میں جانے کی اجازت نہیں ہے۔