قومی دارالحکومت دہلی میں بھارتیہ جنتا پارٹی (بی جے پی) کے صدر جگت پرکاش نڈا نے آج کانگریس کے سینیئر رہنما راہل گاندھی پر طنز کرتے ہوئے کہا کہ 'شہزادے' کو بھارت کی کسی بھی چیز پر بھروسہ نہیں ہے، تو وہ اپنے 'سب سے بھروسے مند ملک' پاکستان کی ہی سن لیں۔
مسٹر نڈا نے آج ٹویٹ کر کے کانگریس پر زوردار وار کرتے ہوئے کہا کہ 'کانگریس کے شہزادے کو بھارت کی کسی بھی چیز پر بھروسہ نہیں ہے، چاہے وہ فوج ہو، حکومت ہو یا ہمارے لوگ ہوں'۔
انہوں نے مزید کہا کہ وہ تو اپنے 'سب سے بھروسے مند ملک' پاکستان کی ہی سن لیں، امید ہے کہ اب تو ان کی آنکھیں کھل گئی ہوں گی'۔
انہوں نے آگے لکھا کہ 'کانگریس اپنی ہی مسلح افواج کو کمزور کرنے کی مہم میں لگی رہی، کبھی ان کا مذاق اڑاتی رہی تو کبھی بہادری پر شبہ ظاہر کرتی رہی'۔
انہوں نے کہا کہ 'ہر قسم کی چالبازی کی تاکہ فوج کو جدید رافیل نہ مل سکے، لیکن ملک کے عوام نے ایسی سیاست کو مسترد کرکے کانگریس کو سخت سبق سکھایا ہے'۔
