قومی دارالحکومت دہلی میں اسرائیلی سفارت خانے کے قریب جمعہ کی شام کو ہوئے دھماکے بعد بھارت نے اسرائیلی حکومت کو یقین دہانی کرائی کہ ان کے سفارتخانے اور اس کے سفارتکاروں کے حفاظت کو یقینی بنایا جائے گا اورقصورواروں کو پکڑنے کے لیےکوئی کسر نہیں چھوڑی جائے گی۔
وزیرخارجہ ایس جے شنکر نے اسرائیل کے وزیر خارجہ گبی اشکنازی سے بات کی اور انہیں یہ یقین دہانی کرائی ہے۔
ڈاکٹر جے شنکر نے یہ بھی کہا کہ حکومت ہند نے اس واقعہ کو بہت سنجیدگی سے لیا ہے اور وہ اس پر کارروائی کرنے کے لیے پرعزم ہے۔
بعدازاں خارجہ سیکریٹری ہرش وردھن شرنگلا نے اسرائیل کے خارجہ سیکریٹری ایلن اوشپتز سے اور وزارت خارجہ میں سیکریٹری سنجے بھٹاچاریہ نے بھارت میں اسرائیل کے سفیر رون مالکا سے بات کی۔
واضح رہے کہ دارالحکومت دہلی کے انتہائی پوش علاقے اورنگ زیب روڈ پر واقع اسرائیلی سفارت خانے کے نزدیک جمعہ کی شام ایک بم دھماکے کی خبر پر افراتفری پھیل گئی تھی۔
قومی تفتیشی ایجنسی (این آئی اے) کی ٹیم جائے واردات پر پہنچ رہی ہے وہیں دہلی پولیس کی سپیشل سیل کی ٹیم نے موقع پر پہنچ کر وہاں دھماکے کے شواہد اکٹھے کیے۔
اس کے ساتھ ہی آس پاس کے علاقے میں چیکنگ بھی شروع کردی گئی تھی تاہم واقعہ کے بعد دہلی پولیس نے پورے علاقے کو سیل کردیا ہے جبکہ جائے واردات پر کثیر تعداد میں پولیس اور نیم فوجی دستوں کی تعیناتی کی گئی ہے۔
خیال رہے کہ کل دہلی میں اسرائیلی سفارت خانہ کے باہر ایک دھماکہ ہوا تھا اس دھماکے میں چار سے پانچ گاڑیوں کو نقصان پہنچا ہے تاہم واقعے میں کسی کے زخمی ہونے کی اطلاع نہیں ہے۔
