گزشتہ شام بودھ مہوتسو کے موقع پر بودھ گیا کے کالچکر میدان میں ملک اور دنیا کی ثقافتوں کا ایک انوکھا سنگم دیکھنے کو ملا۔ اس دوران ستر سالہ ہیمامالینی نے گنیش وندنا کے ساتھ رقص کا آغاز کیا۔ اداکارہ نے ہندوستانی کلاسیکل انداز میں اس کے دھن پر رقص کرتے ہوئے ناظرین پر خوب جادو کیا۔
اس میلے کا افتتاح بہار کے وزیر اعلی نتیش کمار نے کیا اس دوران ان کے ساتھ نائب وزیر اعلیٰ سشیل کمار مودی بھی موجود رہے۔
اترپردیش کے متھرا سے رکن پارلیمنٹ اور ہندی سنیماکی ممتاز اداکارہ ہیمامالینی نے بودھ مہوتسو میں کرشن اور رادھا کے مابین محبت کا مظاہرہ کرنے والے پروگرام کو پیش کر کے بین الاقوامی بدھسٹ فیسٹیول کی ثقافتی شام کو رادھا کرشن کے محبت کے رس سے بھر دیا۔
ریاست بہار کے ضلع گیا کے بودھ گیا میں 'بودھ مہوتسو' کے پہلے دن ثقافتی پروگرام کی شام کا آغاز بہار کے فخر ترانے کے ساتھ کیا گیا۔ اس سے قبل ہیما مالینی کو وزیر اعلی نتیش کمار اور نائب وزیر اعلیٰ سشیل کمار مودی نے چادر اورمومینٹو پیش کیا۔
واضح رہے کی بالی ووڈ کی اداکارہ کے ہزاروں دیوانے اس دوران ان کی ایک جھلک پانے اور دیکھنے کو بیتاب اور بے چین رہے۔
جیسے ہی ہیما مالینی رادھا راس بہاری ڈرامہ لے کر اسٹیج پر پہنچی، ناظرین کی تالیوں سے وسیع پنڈال گونج اٹھا۔ ہیما مالینی بودھ مہوتسو کی ثقافتی شام کو یاد گار اور دلکش بناتے ہوئے رادھا راس بہاری موسیقی پر خوب رقص کیا۔
متعدد ممالک کے ہزاروں افراد میلے میں شرکت کے لئے بودھ گیا پہنچے ہوئے ہیں۔ انڈونیشین فنکاروں نے میلے میں خوش آمدید گانا پیش کیا۔ اس کے بعد لاؤس اور جاپان کے فنکاروں نے اپنے رقص سے سمع باندھ دیا۔ غیر ملکی فنکاروں نے اپنے رقص پیش کرکے کافی تالیاں بٹوریں تو وہیں کامیڈین رویندر جان نے اپنی مزاحیہ انداز سے ناظرین کو خوب مہجوز کیا۔
