دہلی پولیس کو کانگریس اور دو سابق وزرائے اعظم کو "بدنام" کرنے کے لئے بی جے پی رہنما سمبت پاترا کے خلاف شکایت موصول ہوئی ہے۔ انڈین یوتھ کانگریس کے صدر سرینواس بی وی نے دہلی پولیس کمشنر کو بھیجی ہے۔
آئی وائی سی کے رہنما نے پاترا پر دو سابق وزرائے اعظم مرحوم جواہر لال نہرو اور مرحوم راجیو گاندھی کے بارے میں غلط اور جعلی معلومات پھیلانے کا الزام عائد کیا۔ انہوں نے کہا کہ پاترا نے اپنے ٹویٹ میں خاص طور پر ہندی میں ہتک آمیز بیان کے ساتھ تصویر کا استعمال کیا جو مندرجہ ذیل ہے۔
آگر کورونا وائرس کانگریس کے وقت آیا ہوتا 5،000 کروڑ کا ماسک گھوٹالا 7،000 کروڑ روپے کورونا ٹیسٹ کٹ گھوٹالا 20،000 کروڑ روپئے جواہر سینٹایزر گھوٹالا اور 26،000 کروڑ روپئے راجیو گاندھی وائرس ریسرچ گھوٹالا۔
انہوں نے مزید الزام لگایا کہ پاترا نے نہ صرف کانگریس یا اس کے قائدین کا نام استعمال کیا ہے بلکہ پارٹی اور اس کے رہنماؤں کو بدنام کرنے کے لئے دو سابق وزرائے اعظم کی تصویر کو بھی استعمال کیا ہے۔ سرینواس بی وی نے اپنی شکایت میں یہ بھی کہا ہے پاترا کی جانب سے شائع شدہ تبصرے حقیقت پر مبنی نہیں ہے۔لہذا اس کے خلاف کارروائی ہونی چاہئے۔
انہوں نے اپنے شکایتی خط میں مزید کہا کہ ملزم نے پارٹی اور اس کے رہنماؤں کو بدنام کرنے اور عوام کے سامنے ان کی بری تصویر لانے کے ارادے سے یہ ٹویٹ کیا۔ اس کے نتیجہ میں کانگریس ورکنگ کمیٹی کے ممبران اور اس کمیٹی کو ناقابل تلافی نقصان پہنچاہے۔
