کیرالہ کے کوزی کوڈ میں ایئر انڈیا ایکسپریس ایئر کرافٹ، ایئرپورٹ پر لینڈنگ کے دوران حادثہ کا شکار ہو گیا اور طیارہ رن وے سے پھسل کر کھائی میں گر گیا جس کے نتیجہ میں پائلٹ سمیت 19 افراد ہلاک ہوگئے۔
ایئر انڈیا کی اس پرواز میں 191 مسافر سوار تھے۔ یہ طیارہ ہوائی اڈے پر لینڈنگ کے دوران رن وے سے پھسل کر کھائی میں گر گیا۔
اس حادثہ میں پائلٹ اور شریک پائلٹ سمیت 19 افراد ہلاک ہوگئے۔
پائلٹ کی شناخت ممبئی کے کمانڈر کپتان دیپک ساٹھے اور شریک پائلٹ اکھلیش کے طور پر ہوئی ہے۔
اطلاع کے مطابق 120 سے زیادہ افراد شدید زخمی ہیں۔
واضح رہے کہ 'وندے بھارت مشن' کے تحت دبئی سے 191 مسافرین کو لے کر ایئرانڈیا کا طیارہ کوزی کوڈ واپسی کے دوران رات 8 بج کر 15 منٹ پر حادثہ کا شکار ہوگیا۔
وزیر شہری ہوابازی ہردیپ سنگھ پوری نے حادثہ پر گہرے دکھ کا اظہار کیا۔ انہوں نے بتایا کہ ایئرانڈیا اور ایئرپورٹس اتھارٹی آف انڈیا کی راحت ٹیمیں فوری دہلی اور ممبئی سے روانہ کر دی گئی ہیں۔
