ریلوے بورڈ کے چیئرمین وی کے یادو نے کہا ہے کہ 'جموں و کشمیر کے ہر حصے کو ریلوے سے جوڑنے کی کوششیں دسمبر 2022 تک مکمل ہوجائیں گی'۔
انہوں نے کہا کہ 'پورے پروجیکٹ میں 163 کلومیٹر سرنگوں میں سے قومی ٹرانسپورٹر نے 126 کلومیٹر سے زیادہ سرنگ کا کام مکمل کرلیا ہے'۔
یادو نے ورچوئل پریس کانفرنس کے دوران کہا ہے کہ 'کٹرا سے بنیال تک 111 کلومیٹر کے آخری پھیلاؤ پر کام جاری ہے اور اس منصوبے کو دسمبر 2022 تک مکمل کرنے کا ہدف ہے'۔
انہوں نے کہا ہے کہ 'ریلوے نے 37 چھوٹے اور بڑے پلوں میں سے 20 سے زیادہ کی تعمیر مکمل کرلی ہے'۔
یہ بات قابل ذکر ہے کہ ریلوے دریائے چناب پر ریل لنک پروجیکٹ کے حصے کے طور پر پل تعمیر کررہا ہے۔ بھارت کا پہلا کیبل اسٹینڈ ریل پل 'انجی برج' بھی اس میں بہت بڑا کردار ادا کرے گا
اس پل کو اس انداز میں ڈیزائن کیا گیا ہے کہ وہ بھاری وزن کو سنبھال سکے اور تیز ہواؤں کا بھی مقابلہ کرسکے۔
یادو نے کہا کہ 'اس منصوبے کی تکمیل کے لئے خطے میں 250 کلومیٹر سے زیادہ سڑک تعمیر کی گئی ہے تاکہ تعمیراتی مقامات تک ٹرکوں اور دیگر سامان کی نقل و حرکت میں آسانی پیدا ہو'۔
انھوں نے کہا ہے کہ 'اس منصوبے کی تکمیل کے بعد یہ سڑک علاقائی اتھارٹی کے حوالے کردی جائے گی'۔
ریلوے بورڈ کے چیئرمین نے اس امید کا اظہار کیا کہ 'کووڈ-19 وبائی امراض کے اثرات کی وجہ سے درپیش چیلنجز کے باوجود یہ منصوبہ وقت کے اندر مکمل ہوجائے گا اور اس سے بڑے پیمانے پر رابطہ قائم ہوجائے گا’۔
