پیغمبر اسلام حضرت محمد صلی اللہ علیہ وسلم کی ولادت باسعادت کے موقع پر دنیا بھر کے مسلمان مختلف ثقافتی و سماجی سرگرمیاں، مذہبی تقریبات اور خدمت خلق کے کام کرتے ہیں۔
اس سلسلے میں ریاست کرناٹک کے شہر بنگلور کی قدیم درگاہ حضرت توکل مستان سہروردی کی انتظامیہ کمیٹی نے ایک خصوصی اجلاس میں یہ طے کہ کیوں نہ اس ماہ مبارک میں خدمت خلق کے کام بھی ہوں؟ لہذا کمیٹی نے اس سال سے فلاحی کاموں کی ابتداء کرنے کا فیصلہ لیا۔
اس سلسلے میں نامہ نگاروں سے بات کرتے ہوئے حضرت توکل مستان درگاہ کمیٹی کے صدر نثار احمد اور سیکرٹری محمد عنایت اللہ نے بتایا کہ 'اس بار جشن میلاد النبی صلی اللہ علیہ وسلم کے موقع پر 10 نومبر کو درگاہ کے احاطے میں اجتماعی شادیوں کا اہتمام کیا جائیگا۔
انہوں نے کہا کہ 'بنگلور و اطراف سے تعلق رکھنے والے 10 غریب و مستحق جوڑوں کا نکاح عمل میں آئیگا اور انہیں اپنی زندگی گزارنے کے لئے ضروری اشیاء بھی مہیا کی جائے گی'۔
انہوں نے بتایا کہ 'ہر جوڑے پر ایک لاکھ روپے کی رقم خرچ کی جائیگی جس کی ریاستی وقف بورڈ نے منظوری دیدی ہے'۔
نثار احمد نے بتایا کہ ' 10 نومبر صبح ساڑھے دس بجے فاتحہ خوانی کے بعد اجتماعی شادیوں کی تقریب منعقد ہوگی۔
مزید پڑھیں: جلوسِ محمدی پرامن طریقے سے نکالنے کی درخواست
سیکرٹری درگاہ حضرت توکل مستان سہروردی عنایت اللہ نے بتایا کہ 'درگاہ حضرت توکل مستان سہروردی کے زیر سایہ کمیٹی سال بھر مستحق بچوں کو اسکالرشپ، سنت ابراہیمی ختنہ و طبی امداد میں سرگرم رہتی ہے'۔
انہوں نے بتایا کہ کمیٹی کے زیر نگرانی ایک اسکول بھی چلایا جا رہا ہے جس میں تقریباً 300 طلباء زیر تعلیم ہیں۔
