بھارت کی جنوبی ریاست کرناٹک میں گلبرگہ شہر کے درگاہ حضرت خواجہ بندہ نواز کی طرف جانے والے روڈ کے تعمیراتی کام سے مقامی لوگوں کو سخت دشواریوں کا سامنا کرنا پڑ رہا ہے۔ گذشتہ ایک برس سے کام جاری ہے اور کھدائی کر کے بند کر دیا گیا ہے۔
درگاہ روڈ کا کام شروع ہوئے ایک برس ہونے کو ہے، لیکن اب تک اس روڈ کا کام مکمل نہیں ہوسکا ہے۔ ای ٹی وی بھارت سے بات چیت کرتے ہوئے مقامی لوگوں نے انتظامیہ پر لاپروائی کا الزام عائد کیا۔
خیال رہے کہ درگاہ روڈ مختلف راستوں مثلا کے بی این کالج، یونیورسٹی، ہاگراکراس، رنگ روڈ کے علاوہ دیگر راستوں سے بھی منسلک ہونے کے سبب اس کی اہمیت میں اضافہ ہو جاتا ہے۔
گلبرگہ کارپوریشن کمشنر نے ای ٹی وی بھارت کو بتایا کہ درگاہ روڈ کا کام مکمل نہ ہونے کی وجہ، یہاں کے یوجی ڈی ورک اور لینڈ اکوائر کے مسائل ہیں۔
انہوں نے کہا کہ اس روڈ میں جن لوگوں کی عمارتیں آتی ہیں، انہیں کارپوریشن کی جانب سے معاوضے کی رقم دی جا رہی ہے۔ کچھ کو دی جا چکی ہے، جبکہ کچھ کو دیا جانا ہے۔
انہوں نے جلد سے جلد کام کے تکمیل کی بات کہی ہے۔
