ہوابازی کی وزارت نے ٹوئٹر پر جاری سرکاری بیان میں لکھا ہے کہ ہوائی اڈے کو جوڑنے والی سڑکیں بلاک ہونے کی وجہ سے ڈبروگڑھ ہوائی اڈے پر مسافروں کی نقل و حرکت متاثر ہوئی ہے۔ ہوائی اڈے پر پھنسے مسافروں کو مقامی انتظامیہ کی طرف سے ہر قسم کی ضروری سہولت دی جا رہی ہے۔ اس نے کہاکہ 'ان مسافروں کو مرحلہ وار طریقے سے نکالا جا رہا ہے۔ پروازوں کی آمد و رفت میں 12 دسمبر کو آئی عارضی رکاوٹ پر قریبی نگاہ رکھی جا رہی ہے۔ ہوائی جہاز سروس کمپنیوں اور دیگر فریقوں کے ساتھ صلاح مشورہ کر کے حالات معمول پر آتے ہی ہوائی اڈے پر کام شروع کیا جائے گا'۔
انڈیگو نے ایک بیان جاری کر کے بتایا کہ گوہاٹی اور ڈبروگڑھ جانے والی اس کی تمام پروازیں آج منسوخ رہیں گی۔ ان ہوائی اڈوں میں پھنسے مسافروں کو نکالنے کے لئے طے شدہ زیادہ سے زیادہ کرایہ کے ساتھ ریلیف پروازوں کا فیصلہ کیا ہے۔ اس کے علاوہ اس نے گوہاٹی، ڈبروگڑھ اور جورہاٹ ہوائی اڈوں کے لئے 13 دسمبر تک جانے اور وہاں سے آنے والی پروازوں کے ٹکٹ منسوخ کرنے یا ان کی تاریخ میں تبدیلی پر فیس معاف کرنے کا اعلان کیا ہے۔
گوائير اورا سپائس جیٹ نے بھی 13 دسمبر تک کی پروازوں کے ٹکٹ منسوخ کرنے اور تاریخ میں تبدیلی کی فیس معاف کرنے کا اعلان کیا ہے۔
وستارا نے کہا ہے کہ حکومت کے مشورے پر اس نے ڈبروگڑھ اور باگڈوگرا کے درمیان آج کی اپنی دونوں پروازیں منسوخ کر دی ہیں۔ اس نے گوہاٹی اور ڈبروگڑھ ہوائی اڈوں کو جانے اور وہاں سے آنے والی پروازوں کے 15 دسمبر تک کے ٹکٹ منسوخ کرنے یا تاریخ میں تبدیلی کی فیس معاف کرنے کا اعلان کیا ہے۔
