عالمی سطح پر کورونا وائرس کا قہر رکنے کا نام نہیں لے رہا ہے ، اس وبا سے ہزاروں کی تعداد میں لوگ متاثر ہورہے ہیں۔
امریکہ کی جان ہاپکنس یونیورسٹی کے سائنس اینڈ انجینئرنگ سینٹر (سی ایس ایس ای) کی جانب سے جاری کردہ تازہ ترین اعداد و شمار کے مطابق کورونا وائرس سے اب تک پوری دنیا میں 95 لاکھ 20 ہزار 96 افراد متاثر ہوئے ہیں جبکہ 4 لاکھ 83 ہزار 957 افراد کی موت ہوچکی ہے۔
کووڈ ۔19 کے معاملے میں امریکہ پہلے، برازیل دوسرے اور روس تیسرے نمبر پر ہے۔ دوسری جانب اس وبا سے ہوئی اموات کے اعداد و شمار کے معاملے میں امریکہ پہلے ، برازیل دوسرے اور برطانیہ تیسرے نمبر پر ہے۔
امریکہ میں اب تک 24 لاکھ 63 ہزار 168 افراد کورونا سے متاثر ہوئے ہیں اور ایک لاکھ 24 ہزار 279 افراد لقمہ اجل بن چکے ہیں۔ برازیل میں اب تک 11 لاکھ 92 ہزار 474 افراد اس وائرس کی زد میں آچکے ہیں جبکہ 53 ہزار 874 لوگوں کی موت ہوچکی ہے۔
روس میں بھی کورونا وائرس کا قہر بڑھتا ہی جا رہا ہے اور اب تک 6 لاکھ 6 ہزار 881 افراد متاثر ہوئے ہیں جبکہ اس انفیکشن کی وجہ سے اب تک 8 ہزار 513 افراد اپنی زندگی سے ہاتھ دھو بیٹھے ہیں۔
برطانیہ میں بھی اس انفیکشن کی وجہ سے صورتحال مزید خراب ہوتی جارہی ہے یہاں اب تک 3 لاکھ 6 ہزار 862 افراد اس وبا سے متاثر ہوچکے ہیں اور 43 ہزار 81 افراد اپنی جان گنوا چکے ہیں۔
انفیکشن کے معاملے میں پیرو اور چلی دنیا میں بالترتیب چھٹے اور ساتویں نمبر پر ہیں۔ پیرو میں متاثرہ افراد کی تعداد 2 لاکھ 64 ہزار 689 ہےجبکہ مرنے والوں کی تعداد 8،586 ہے۔
چلی میں اب تک 2 لاکھ 54 ہزار 416 افراد کورونا وائرس سے متاثر ہوچکے ہیں جن میں مرنے والوں کی تعداد 4،731 ہے۔
