بی جے پی نے دعوی کیا ہے کہ 11 فروری کو دہلی انتخابات کے نتائج سامنے آنے کے بعد وہ حکومت بنائے گی۔ زعفرانی جماعت نے کہا کہ ایگزٹ پولس نتائج کی حقیقی تصویر پیش نہیں کرتے اور ہماری پارٹی 70 میں سے 48 سینٹیں جیتے گی۔
ای ٹی وی بھارت سے بات کرتے ہوئے بی جے پی کے قومی ترجمان شاہنواز حسین نے کہا کہ ایگزٹ پولس انتخابی نتائج کی حقیقی تصویر پیش نہیں کرتے اور کئی بار یہ غلط بھی ثابت ہوچکے ہیں ، ایک مرتبہ 11 فروری کو نتائج سامنے آنے دیجئے۔
بی جے پی کا نجی سروے صاف طور پر بتارہا ہے کہ پارٹی 48 سیٹیں جیتے گی اور دہلی میں حکومت بنائے گی۔ انہوں نے کہا کہ عام طور پر عوام اپنے دل کی بات نہیں بتاتے کہ کون جیتے گا۔
ای وی ایم کی حفاظت اور شفافیت پر پوچھے گئے سوال کے جواب میں انہوں نے کہا کہ جو لوگ ای وی ایم پر خدشات ظاہر کررہے ہیں وہ اپنے شکست قبول کرچکے ہیں۔
کئی کمپنیوں کی جانب سے جاری کیے گئے ایگزٹ پولس میں بی جے پی کو 10 تا 20 سیٹیں دی گئی ہیں جبکہ کیجروال کی زیر قیادت عام آدمی پارٹی کو واضح اکثریت دی گئی ہے اور کہا گیا کہ عام آدمی پارٹی مسلسل دوسری مرتبہ دہلی میں حکومت بنائے گی۔
