پولیس کے مطابق لکھنئو ایکسپریس وے پر دہلی سے بہار کے موتيہاری جارہی ڈبل ڈیکر بس فیروز آباد ضلع کے ننگلہ کھنگر علاقے میں کنٹینر سے ٹکرا گئی۔
اس حادثے میں کنٹینر کے ڈرائیور سمیت 14 افراد کی موت ہوگئی جبکہ 31 افراد زخمی ہوئے ہیں جن میں چند افراد کی حالت تشویشناک بتائی جا رہی ہے۔
پولیس نے بتایا کہ 'تمام زخمیوں کو فوری طور پر ہسپتال میں داخل کرا دیا گیا ہے، ہلاک شدگان میں بیشتر افراد بہار کے رہنے والے ہیں۔
تفصیلات کے مطابق ' یہ بھیانک سڑک حادثہ بدھ کی شب تقریباً دس بجے پیش آیا جس میں دس افراد کی موقع پر ہی موت ہوگئی تھی جبکہ چار افراد دوران علاج دم توڑ دیا۔
حادثے کی اطلاع موصول ہونے کے بعد پولیس موقع پر پہنچی اور متاثرین کو فوری طور پر سیفئی میڈیکل کالج منتقل کیا گیا۔
بس میں تقریبا 60 مسافر تھے، پولیس کے بیان کے مطابق مرنے والوں میں 12 افراد کی شناخت ہوگئی جس میں مکیش(26 برس)، ونود(25 برس)، کلیم الدین(45 برس)، بھگونت(54 برس)، ہریندر پاسوان(44 برس)، چندن(24 برس)، ساگیشور شاہ(42 برس)، گلشن(25 برس)، انل شاہ(50 برس)، راکیش (35 برس)، اشتیاق(30 برس) اور 45 سالہ کنٹینر ڈرائیور بھورا شامل ہیں۔
اس ہولناک سڑک حادثے پر وزیراعلی یوگی آدتیہ ناتھ نے رنج کا اظہار کرتے ہوئے زخمیوں کے بہتر علاج کے لیے وہاں کے ضلع مجسٹریٹ اور پولیس سپرنٹنڈنٹ کو ہدایت دی ہے ۔
